Hans Enoksen: Namminersornerullutik Oqartussani pisortat kalaaliusariaqarput
Pisortatut sulissagaanni inuiaqatigiit oqaasii aallaavigalugit sulisariaqarput, taamaattumillu kalaallit oqaasiinik paasinnissinnaasunik aquttunik siuttunillu sulisoqartariarpoq tamassumalu sulissutigineqarnissaanut siuttuuniarpoq.
Namminersornerullutik Oqartussat allaffeqarfissuani sulineq kalaalerpalunnerusariaqarlerpoq. Ilinniagaqarneq minnerunngitsumillu oqaatsit tassani aallaavigineqarput, kikkulluunniit nunami maani pisortaassagunik inuiaqatigiit oqaasii aallaavigalugit sulinerit ingerlanneqartariaqarput, Hans Enoksen oqarpoq, tusarnaarneqarsinnaasariaqarput, tassami oqaasii paasisinnaanagillu pisortaassagaanni assorujussuaq ilungersunartuusussaavoq, taamaattumillu allannguiniarnermi oqaatsitsinnik paasinnissinnaasut aamma siuttunut aquttunullu ilaasariaqartut, Hans Enoksen oqarpoq.
Hans Enoksen Namminersornerullutik Oqartussat pisortaanik ikilisaalernermut atatatillugu kalaallinik inuttalersorneqarnisaannik oqarnera kalaalinngorsaaneragaavoq, tamannalu pillugu Hans Enoksen oqarpoq: ” Isertuussimanngisaannarpara inuiannik kalaallinik illersuinera aamma takusinnaagakku pisinnaasorpassuit atorneqanngitsut, uanilu aalajangiusimalluinnarpara, massakkut inuiaqatigiinni allannguisoqartariaqarpoq, misilittakkat maani uninngatinneqartariaqarput avammut tunniussuunnagit, minnerunngitsummillu erseqqissassavara aaqqissuusseqqinnissami qallunaaluartoqanngimmat, kisianni oqaatsit misilittakkat ilinniagaqarnerlu pingaarnerutillugit aaqqissuussisoqartussanngormat” Hans Enoksen oqarpoq. Qallunaanik atorfinitsitsisoqaraangat ataasiarluniluunniit assortuussutigineqanngisaannarnikuuvoq.
Oqallinneq maannakkut ingerlanneqalersoq nuannaarutigaara, kiisami maannakkut kalaallit periarfissaqalerput taaannalu uanga siuttuuffiginiarpara, Naalakkersuisut siulittaasuat Hans Enoksen oqarrpoq.
Naalakkersuisut siulittaasuat ilanngullugu oqarpoq, namminersornerulerneq sioqqulluguli oqallisigineqarsimasoq, kalaallit sulisorineqarsinnaasut atorneqassasut tamannalu oqaasiinnaasimasoq. Allannguiniarnermilu maanakkut periarfissanngortoq.
