Hans Enoksen nalimmassaaniarpoq

- Isumaqarpunga ikiliartortutut isikkoqanngitsoq partiimmi nutaamik takkuttartut soorunami qinersisartunik tigooraasarput aammalu innuttaasut namminneq aalajangertarpaat kikkunnik taasissanerlutik, taamaammat oqartoqarsinnaanngilaq ikiliartortut, kisianni tassa nammineq aalajangiisarnerat tunngavigalugu taasisut siammariartorput, Hans Enoksen oqarpoq.

Kalaallit Nunaanni inuuniarnikkut allannguutaasoq tassaavoq akit assigiikkunnaarsinneqarnerat. Naalakkersuisut siulittaasuunermini tassunga aalajangiinermut akisussaasuusoq oqarpoq:

-Tassa innaallagissamut imermullu akit taakku atuuffiata qiteqqunnerata kingorna paasivarput naleqquppallaanngitsumik aalajangiisimalluta, pingaartumik nunaqarfinni isorliunerusunilu najugallit eqqarsaatigalugit, taakku akit pinngitsooratik nalimmassarneqarnissaat piffissanngorpoq, taanna allanngortinniarlugu sulisaagut aamma naammassissavarput.

Akilerneqassappat kikkunninngaanniit? Inuiaqatigiit nammaqatigiilluta ingerlanerput tunngavigalugu akit nassaarineqassapput aamma isumaqarpunga akit naleqqussarnerisigut aningaasartuutikillisaanikkut ilarparujussui nassaarineqarsinnaassasut.

Partiimut Siumumut siulitaasuunermini aalajangiinerit sunniuteqaqisut ilagaat angallannerup allanngortinnera.

Innuttaasut angalaniarnerat pingaartumik nunaqarfiit eqqarsaatigalugit ilungersunartorujussuarmik inissisimanerat takunngitsuusaarsinnaajunnaarparput taamaammat ataatsimoorluta ikioqatigiillutalu tassuuna aaqqiiniaqatigiitariaqarpugut.

Qanoq aningaasalersorneqassanersoq apequtigigatsinni Hans Enoksen nassuiaavoq:

- Akiliisoqassappat nunata karsiani aamma aningaasanik ujarlertariaqassaagut, Hans Enoksen oqarpoq.