Hans Enoksen: Naammaleqaaq!
Naalakkersuisooqatigiit ilaannakunngorlutik, Inuit Ataqatigiit naalakkersuisooqataajunnaarput.
Naalakkersuisut siulittaasuat Hans Enoksen, naalakkersuisooqatigiinnermut taamatut isikkoqalersumut qanoq isumaqarnersoq, Qanorooq aperaaq, Naalakkersuisullu siulittaasuat ima oqarpoq:
- Soorunami Atassutikkut oqaloqatigeqqissaarpagut, aammalu tunuliaquttagut, tassalu Atassutip gruppia Siumullu gruppia oqaloqatigiipput, tassalu aalajangernissaq nuanniikkaluartoq, aalajangerparput, Naalakkersuisooqatigiinneq ingerlaqqissinnaanngitsoq. Hana Enoksen oqarpoq nangillunilu:- Ulluni kingullerni pisut imaannaanngitsut, naalakkersuisooqatigiinermi pisut, pingaartumik raajarniarnermut nalunaarusiap allanngorteqqinneqarnissaanut tunngasoq, pissutaaqataavoq. Raajarniarnermut nalunaarut pillugu, naalakkersuisooqatitta nuannerpallaanngitsunik tunngavilersuuteqarlutik avammut nalunaaruteqartarsimapput. Soorunami aamma oqaatsit killeqartariaqarmata tamaanga killippugut, Hans Enoksen Qanoruumut naggasiilluni taama oqarpoq.
Naalakkersiusooqatigiinnermut assortuussutaasoq tassaavoq raajanut nalunaarutip ukioq manna atuutilersinneqartup atorunnaarsinneqarluni nalunaarummut nutaanngitsumut uteqqinnissaq.
Inuit ataqatigiit raajanut nalunaarutip ukioq manna atuutilersup atuutiinnarnissaa piumasaraat, akerlianilli naalakkersuisooqataasut Siumut sinnerlugu inatsisartuni ilaasortat, Atassutillu inatsisartunut ilaasortaatitaasa ilaannaat, raajanut nalunaarutip nutaanngitsup atoqqinneqalernissaa kissaatigalugu. Taamatullu naalakkersuisooqatigiit iluanni isumaqatigiinnginneq, naalakkersuisooqatigiinnerup isasoorneranik kinguneqarpoq.
