Hans Enoksen: Naalakkersuisut unioqqutitsimanersut mississoqquarput

- Misissuisitsinissaq isornartorsiuisut apeqqusiineri tunngavigalugu ilusilersugaavoq, misissuisussarlu arlaannaannulluunniit attuumassuteqanngilaq. Naalakkersuisut siulittaasuat Hans Enoksen taama oqarpoq.
Allattoq Jaaku Lyberth
decembarip 17-at 2008 17:46

Qasigiannguani efterskolissamut immikkut aningaasaliinermi pisut misissorniarneqalermata, misissuinissaq misissuisussatullu toqqarneqartoq arlaannaannulluunnit attuumassuteqanngitsutut oqaatigineqarsinnaanngitsoq, arlalinnit isornartorsiorneqarpoq.

Hans Enoksen-ili taama isumaqanngilaq:

Maani isertugassaqanngilagut sumilluunniit, minnerpaamilluunniit peqquserlunnermik anguniaqarsimangilagut Hans Enoksen oqarpoq.

Misissusitsinissami inatsisartut kukkunersiunermi ataatsimiititaliaq peqataatinneqartariaqarsimanngila Hans Enoksen ?

“Kukkunersiunermi ataatsimiititaliap oqaasii tunngavigalugit, pasilliutaat tunngavigalugit suliakkerneqarpoq, uku ukulu mississussavatit, aammalu naalakkersuisut akuliunniarsimanersugut misissorneqassasoq, inatsisit unioqqutillugit naalakkersuisut sulisimanersut misissorneqquarput ! “ Hans Enoksen oqarpoq.

Kukkunersiunermik ataatsimiititaliaq apeqqutinik piareersaatigisimasinnaaneraa Hans Enoksen-imut apeqqutigineqarmat taanna oqarpoq, ataatsimiititaliaq attaavigineqarumaartoq isummersuutaallu misissoqqissaarneqassasut.

Hans Enoksen ilanngullugu oqarpoq, Ole Spiermann nammineq ilisarisimanagu attavigisimanngisaannarsimallugu.

Ole Spiermann naalagaaffiup iluani inatsisitigut ilisimasaqarluarmat misissuisussatut toqqarneqarpoq, taannalu naalakkersuisut siulittaasoqarfiani atorfillit mississuinerat aallavigalugu innersuussutigineqartoq, Hans Enoksen oqarpoq.