Hans Enoksen: Naalakkersuisut Inatsisartunut salloqittaapput
Royal Greenlandip nunaqarfinni tunisassiorfii matuneqarsimasut namminersortunngorsarneqarsinnaanerat Kattusseqatigiit Partiiat sinnnerlugu inatsisartuni ilaasortap Knud Fleischerip siunnersuutigaa.
Suliffeqarfissuaq Royal Greenland sallunerarlugu kisimi pisuutinneqanngilaq.
Naalakkersuisut siulittaasuat Kuupik Kleist Royal Greenlandip nunaqarfinni tunitsivii pillugit paasissutissanik inatsisartut oqallinneranni saqqummiussimmat aamma salluneragaavoq.
Hans Enoksenip Royal Greenland sallunerarlugu pasilliutaa aamma uannut pasillerneruvoq, Inatsisartunut paasissutissanik eqqunngitsunik saqqummiussisimassagama, Kuupik Kleist oqarpoq.
Royal Greenlandip tunisassiorfiinik matuneqarsimasunik namminersortunngorsarneqarnissaanik inatsisartuni siunnersuut itigartinneqarpoq, tunisassiorfinnik Royal Greenlandip pigisaanik nunaqarfinniittunik matuneqarsimasunik soqanngimmat, Sarfannguani Itillimi Royal Greenlandip tunisassiorfii namminersortunnngorsaneqareerput, aamma Royal Greenlandip Arsummi tunisassiorfia apriilip aallaqaataani suliffeqarfimmut namminersortumut tunineqarpoq, suliffeqarfik taanna nunaqarfimmi innutaasunit annerusumik pigineqarpoq.
Royal Greenlandip nunaqarfinni tunisassiorfii tamarmik ingerlapput, aviisi sermitsiap nittartagaani Sermitsiaq.ag -imi taamatut allaaserisaqarpoq.
Tamanna salluneruvoq, Qaarsuni tunisassiorfik matoqqavoq, Hans Enoksen oqarpoq, taassuma Naalakkersuisut Inatsisartuni paatsiveerussaanerarlugit pisuutippai.
Paasissutissat Royal Greenlandimit akissutigineqartut Kuupik Kleistip inatsisartuni paasissutisiinermini innersuussutigai, suliffeqarfissuup nalunaarutigimmagu, Royal Greenlandip Qaarsuni tunisassiorfiani nipisat suaannik tunisisoqartarmat Qaarsunilu tunisassiorfik matuneqarani ukiup ilaannaa tunisassiorfittut atorneqartartoq.
Knud Fleischerip siunnersuutaa inatsisartut aalisarnermut ataatsimiititaliaanut ingerlateqqittussanngortinneqarpoq, tamannalu ilutigalgu misissorneqassaaq suliffeqarfissuaq Royal Greenlandip paasissutissanik kukkusunik Naalakkersuisut siulittaasuannut tunniussisimanersoq, aviisip sermitsiap nittartaga sermitsiaq.gl taamatut allaaserisaqarpoq.