Hans Enoksen naalakkersuisunngortitsinissamut isumalluarpoq

Inuit Ataqatigiit, Siumut aamma Atassut naalakkersuisunngortitsinissaq siunertaralugu isumaqatigiinnialeruttorput, isumaqatigiinniarnerlu sioqqullugu partiit pineqartut siuttui tunuliaquttaminnik ataatsimeeqateqarput.

Naalakkersuisuugallartut aamma Siumup siulittaasua Hans Enoksen siulersuisuunernik ataatsimeeqateqareerluni ima oqarpoq:

- Oqaloqatigiinnerit ajunngilluinnartumik paaseqatigiillunilu ingerlanneqarput, pisinnaatinneqarpugut isumaqatigiinniarnernik ingerlatsinissamut. Hans Enoksen taama oqarpoq.

Isumaqatigiinniarniviit ualeru aallartissinnaanissaat naatsorsuutiginerarpaa.

- Isumaqatigiinniartut siuttuattut taama siunnerfeqarpunga, uninngaannarsinnaajunnaarpugut. Aallartissaavut sukkasuumik naammassinissatta tungaanut. Partiit pingasut naalakkersuisunngortitsisinnaanerat siunnerfigaara aamma inuiaqatigiit kissaatigaat pitsaasumik sullinneqarnissartik naammassissagipput, uangalu tamatuma naammassinissaanut akisussaaqataavunga iluatsinnissaanut. Hans Enoksen erseqqissaavoq.

Siumup pingaarnertut piumasaraa, tatigeqatigiilluni inuiaqatigiillu toqqissillutik ingerlanneqarnissaat naammassineqarnissaa.

- Soorunami tamatta piumasatsinnik saqqummiussissaavut aamma qineqqusaarnermi siunnerfivut anguniakkavullu isumaqatigiinniarnermi aallaaviussapput tamatsinnut. Hans Enoksen erseqqissaavoq.

Meeqqanut check isumaqatigiinniarnerni qitiusoq pinngitsoornanilu anguniarneqassasoq, Siumup siulittaasuata erseqqissaatigaa.