Hans Enoksen: Meeqqanut ileqqaakkat ataavassapput

Meeqqat ileqqaarutissaat 1.000 koruunit aningaaserivimmut siulliit ikineqareerput. Tassalu kontonut taakkununnga aningaasanik ukiut tamaasa ikisisoqartassaaq. Naalakkersuisut siulittaasuat, Hans Enoksen, oqarpoq, sipaagaqartitsineq ataavartuussasoq.
Allattoq Jens Thorin
juulip 06-at 2007 13:52

- Meeqqanut sipaagaqartitsinermi aningaasanik peersinissamik imaluunniit ikililerinissamik Naalakkersuisuniit pilersaaruteqanngilagut. Inatsisartut inatsisaatigut akuerineqareerpoq, taamaammallu siunissami attatiinnarneqassapput. Naalakkersuisut siulittaasuat taama erseqqitsigisumik neriorsuivoq.

- Meerartavut pingaartillugit oqalukkaangatta, taava aningaasatigut ajornartorsiulerlutalu meeqqanut tunngasut piiarniarneqartarnerat akuerineqarsinnaanngilaq, ileqqaarutissarsiortariaqaleruttalu, allat siulliullutik eqqorneqartariaqarput, Hans Enoksen nangippoq.

Taassuma erseqqissarpaa, Nunatta Karsia maanna patajaattumik inissisimasoq, silatuumillu ingerlatsisoqarpat, siunissaq isumannaatsuusoq.

- Meeqqanut sipaagaqartitsineq siunissamut aningaasaliineruvoq. Pissarissaarnerusut massakkut sukkanerusumik initaarsinnaasarput, pissakinnerusut ukiorpassuarni utaqqisarlutik. Qularnanngilaq sipaagaqartitsinikkut initaarniarlutik utaqqisut sinissami malunnartumik ikilissasut, Naalakkersuisut siulittaasuat Hans Enoksen oqarpoq.

Akileraarnermut Pisortaqarfimmiit oqaatigineqarpoq, meeqqat ileqqaagaqartinneqalersut 18.000 missaanniittut, taakkununnga ilaallutik ilinniartut Nunatsinneersut meeraat nunani allani inunngortut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq