Hans Enoksen: Meeqqanik sumiginnaaneq akiortariaqarparput

Meeqqat sumiginnagaallutik kaatsinneqartut iliuuseqarfiginiarlugit Naalakkersuisut Siulittaasuata Hans Enoksenip susassaqartunik ataatsimeeqateqaqattaarnera ippassaq ingerlaqqippoq.
Allattoq Lotte Holm
januaarip 30-at 2009 08:13

Naalakkersuisut Siulittaasuata angajoqqaat kisimiillutik pilersuisut aallartitaat kiisalu suliniaqatigiiffik Meeqqat Inuunerissut aallartitaat ippassaq ataatsimeeqatigai.

- Angajoqqaat kisimiillutik pilersuisut atugaat pineqartunit namminermit tusarlugit imaannaanngilaq, Naalakkersuisut siulittaasuat Hans Enoksen ataatsimeeqateqarnermini ilaatigut taama oqarpoq.

Suleqatigiissitaq suliassanik qulaajaasussaq tulleriiaarinissamillu siunnersuusiortussaq februaarip aallartilaarnerani pilersinniarneqarpoq. Tassani angajoqqaat kisimiittut pilersugallit, suliniaqatigiiffiit, kattuffiit suliassaqartullu allat tamarmik katersorniarneqarput, taamaalilluni nukiit meeqqanik atugarliortitsinermut akiuisussat katersorniarneqarlutik.

Naalakkersuisut Siulittaasuata maannamut PIP, IMAK, aamma KANUKOKA ataatsimeeqatigereerpai. KANUKOKA aammaarluni ataatsimeeqatigineqartussaavoq, ullumilu naapinneqartussat tassaapput Sorlak aamma SIK.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq