Hans Enoksen: Killormut iliunngilanga
Ammeriviup Great Greenlandip misissuiffigeqqissaarneqarnissaanik piumasaqaateqarneq Atassummit aalajangiusimaneqartoq Atassutip inatsissartuni gruppiata siulittaasua, Augusta Salling ippassaq radioavisimi oqarpoq. Tamanna pillugu Atassut Naalakkersuisut siulittaasuannut Hans Enoksenimut apeqquteqaateqarpoq, naalakkersuisullu siulittaasuat ullumi akissuteqarpoq.
Atassutip apeqquteqaateqarnera, Naalakkersuisut siulittaasuata inatsisartut oqaluttarfianit februaarip 17-ani oqaaseqarneranik, tassa Great Greenlandip ingerlanneqarnerata misissueqqissaarfigineqarnissaanik oqarneranik tunngaveqarpoq.
Atassutip siulittaasuata, Finn Karlsenip, Ammerivimmi Great Greenlandimi aqutsisunik pinerluttuliorsimasutut pasillernerata kingorna, Hans Enoksen oqarpoq, Great Greenlandimi inunnut ataasiakkaanut tunngasunik misissueqqissaartoqassanngitsoq, oqarporli amminut tapiissutaasartunut tunngasut misissoqqissaarneqassasut.
Taama oqariartuuteqarneq Atassummit apeqquserneqarpoq.
- Inatsisartut oqaluttarfiannit neriorsueriarluni killormuuanik oqaannartoqarsinnaanngilaq, Augusta Salling Radioaviisimut ippassaq taama oqarpoq.
- Inatsisartut oqaluttarfiannit neriorsuieriarlunga killormut iliunngilanga. Inatsisartut oqaluttarfiani oqaaserisakka ilumoorput aamma Naalakkersuisut ukioq manna februaarip 22-iani aalajangiuppaat Great Greenland misissuiffigeqqissaarneqassasoq.
Hans Enoksen akissuteqarluni allappoq.
Tamanna tunngavigalugu misissueqqissaarnerup ingerlanissaa pillugu Naalakkersuisut Allattoqarfiata Great Greenland A/S-ip misissuiffigeqqissarneqarnissaanut Naalakkersuisut aalajangiiffigisassaat suliarineqarluni naammassisoq, Enoksen allappoq.
- Naatsorsuutigaara sapaatip akunnerata matuma suli naannginnerani Naalakkersuisut aalajangiiffigissagaat, Hans Enoksen Augusta Sallingingip ippassaq Radioavisimi pasilliutaanut akissuteqarluni taama erseqqissaavoq.
- Suliami matumani pasilliinerit tusatsiakkanik aallaaveqartut Naalakkersuisuni sulinitsinni tunngavittut atorsinnaanngilluinnarpavut. Pinerluttoqarsimaneranik uppernarsaatissanik peqartoq kinaluunniit politiinut nalunaaruteqartussaavoq aamma Naalakkersuisut politiitut piginnaassuseqarlutik misissuisinnaatitaanngillat, Hans Enoksen allappoq. Uppernarsarumavaa misissueqqissaarnermi, puisit amiinut tapiissutinut sipaarniutissat ukioq mannamut aningaasanut inatsisissamut siunnersuummiittut piniartutut inuussutissarsiornermut Great Greenland A/S-imullu kingunerisassai mississoqqissaarneqassasut.
-Tamatuma saniatigut Naalakkersuisut Great Greenland A/S suleqatigalugu Canadamiut puisit amiutaannik pisisarnerup unitsinneqarneranik aalajangerneq upernaap ingerlanerani naliliiffigeqqissavaat, Hans Enoksen erseqqissaavoq.
