Hans Enoksen: Kammalaatersortoqanngilluinnarpoq
Nunaqarfiit ataatsimeersuarnissaanni aaqqissuisussanik toqqaanermi kammalaatersortoqanngitsoq Hans Enoksen oqarpoq, atorfilittanilu assorsuaq kamaallugit isertorani oqarpoq.
Nunaqarfiit ataatsimeersuarnissaat, Sisimiuni qaammatip tulliani ingerlanneqartussaq, aaqqissuutissallugu siunnersuisartut Toornaq Consulting Aps ukiup aallartinnerani suliakkerneqarput. Naalakkersuisulli siulittaasuata siunnersuisartut Toornaq Consulting, Siumumeersumik Per Kunuk Lynge-mik ingerlanneqartumik Arctic Innovators-imik taarserpaat. Taamalu pisoqarmat Hans Enoksen kammalaatersornerarlugu Demokraatineersup Lene Knüppel-ip uparuarpaa. Kammalaatersortoqanngitsorli Hans Enoksen oqarpoq, siunnersuisartut, Toornaq Consulting, allattoqarfiup, nammineq ilisimanngisaminik, januaarimi attaveqarfigisimammassuk.
- Allattoqarfimmi suliaq aallartinneqarsimasoq januaarimi paasigakku ingerlaannarlunga unitsippakka, aningaasanut inatsit suli akuerineqanngimmat. Taamani aamma oqarfigineqarpunga, Toornakkut oqaasiinnakkut isumaqatigiissuteqarfigineqarnikuummata aningaasartuutigineqassanngitsut, ulloqeqqanulli radioaviisimi tusarpara 80.000 koruuninik akilerneqarsimasut. Taamaammat aamma atorfilittakka assorujussuaq kamaappakka. 80.000 koruunit akuersissutitaqanngitsumik atorfilittannit tunniunneqarsimassapput. Atorfillit iluminni naamminneq tamanna aaqqissimassavaat, Hans Enoksen kamaqqaqisoq oqarpoq.
Naalakkersuisut siulittaasuat Demokraatineersumut Lene Knüppelimut allakkamini allappoq, Toornamik isumaqatigiissuteqarneq 80.000 koruuninik akeqarsimasoq, Hans Enoksen-illi tamanna ilisimasaqarfiginagu oqarpoq.
Arctic Innovators-imik toqqaaneq peqquteqartinneqarpoq, nunaqarfiit 2004-mi ataatsimeersuarneranni taakku aaqqissuussisuummata.
Demokraatiniilli tamanna akuerineqarusunngilaq.
-Isumaqanngilanga taanna utoqqatsissutaasinnaasoq. Tulluarnerussagaluarpoq suliassanut angisuunut tunngatillugu naalakkersuisut suliariumannittussarsiuussisartuuppata, aki naleqqunnerusoq taamaalilluni pineqarsinnaassammat, Lene Knüppel oqarpoq.
Arctic Innovators-ip nunaqarfiit ataatsimeersuarnerannik aaqqissuussinera 264.000 koruuninik akeqarpoq.
Pisoq Toornaq Consulting-iminngaanniit oqaaseqarfigineqarusunngilaq, Arctic Innovators-imeersorlu, Per Kunuk Lynge, ualiartoq pissarsiarisinnaasimanngilarput.
