Hans Enoksen: Kalaallit Nunaat EFTA-mut ilaasortanngornavianngilaq

Piginnaatitsinermut inatsit, Nunat tamat akornanni killeqanngitsumik niueqatigiinnermut suleqatigiiffik EFTA, ilaatigut tamakku eqqartorneqarput naalagaaffeqatigiinnerup iluani Savalimmiuni ataatsimiittoqaqqammernerani Savalimmiuni atorfillit ilaat naapertorlugu Piginnaatitsinermut inatsisip nutaap Savalimmiormiunut nunatsinnullu periarfissiisinnaanissaa illuatungeriit eqqartorpaat.

Eqqartuinermut atatillugu Savalimmiormiunit kissaatigineqarpoq, Savalimmiormiut EFTA-mut ilaasortanngornissaa Danmark-ip akuerissagaa. EFTA-mi ilaasortaapput Island-i, Norge Schweiz aamma Liechtenstein.

Savalimmiormiut kissaataat statsminister Anders Fogh Rasmussen-imit akuersaartumik tigineqarpoq. Kalaallit Nunaat EFTA-mi ilaa-sortanngorusussinnaanersoq tusagassiortunit katersortitsinermi naalakkersuisut siulittaasuannut Hans Enoksen-imut apeqqutigineqarmat, oqaatigaa tamanna eqqarsaatigineqanngitsoq.

Akerlianilli savalimmiormiut kissaataat tassa-lu Nordiks Råd-imut Nordisk Ministerråd-imullu ilaasortannguvinnissamik imalik, nunatsinnit isumaqatiginartinneqarnerulluni.

Siunnersuuteqarsinnaanernut oqaaseqarsinnaanernullu Kalaallit Nunaat ministerråd-imi ataatsimeeqataasarpoq.

Statsministerip neriorsuutigaa Helsinki-mi isumaqatigiissumut ilassuteqarnissaq misissorumallugu. Tassalu Kalaallit Nunaata Savalimmiullu nammineerlutik aallartitaqartutut inissisimalersinnaanerat, tamannalu nunani avannarlerni suleqatigiinnut saqqummiutilersaarpaa.