Hans Enoksen: Jens Napãtôk' kisiartaalluni nassaartuunngilaq

Siornatigut Ineqarnermut Attaveqarnermullu Naalakkersuisuusoq Jens Napãtôk’ Namminersornerullutik Oqartussat akiligaannik pitsaasumik viinnilerlugu nuliaminut meeqqaminullu ilassinnilluni nereqatigiinnissanut qaaqqusisarnermik periaatsimik nutaamik kisiartaalluni nassaartuunngilaq.

Tamanna Naalakkersuisut siulittaasuata Hans Enoksenip erseqqissumik paasissutissiissutigaa, nammineq atukkat pisortallu ilassinnissutaasa ataatsimoortinnerini piginnaatitaanerminik atornerluisimasutut unnerluutigineqartumut ullumi ilisimannittutut nassuiaateqarnermini.

- Naalakkersuisunut ilaasortat amerlaqaat nuliaminnik meeqqaminnillu ilassinnissutinik nerisitsisartut, aamma Naalakkersuisutut siulittaasunngunngikkallaramali. Tamanna apeqquserneqanngisaannarpoq. Maannali naalakkersuinikkut oqallinnerup sakkortusiartuinnarneranik apeqquserneqartalerpoq, taamaalillutillu inuit ataasiakkaat malersorneqartalerlutik, Hans Enoksen oqarpoq.

Ilaqutariilli qaqugukkut qaaqqusanut ilanngunneqartarnerannut assersuusiulerami nassuiaataa Napãtôk’-p periaasianit allaanerussuteqarpoq. Enoksenip pisut immikkut ittut erseqqissaatigai, soorlu aallartitat tikeraarnerini, ataatsimeersuarnerni assigisaanilu, Napãtôk’-lli taavai tamakku ikinngutinilu naalakkersuinikkut periarfissarsiornerusut aamma naalakkersuinerup silarsuaata avataasigut.