Hans Enoksen isumalluarpoq

Allattoq Carla Davidsen
septembarip 06-at 2005 06:20

- Arctic Travel Groupimut isumaqatiginninniarnissannut isumalluaqaanga.

Umiarsuaatileqatigiiffiup Arctic Umiaq Line-p tunineqarnissaa pillugu oqallinnissaq sioqqullugu Naalakkersuisut siulittaasuat, Hans Enoksen taama oqarpoq. Immakkut angallannerup namminersortunit ukioq nutaamiit tiguneqarnissaa Naalakkersuisut kissaatigaat.

Arctic Travel Group inngerlatseqatigiiffinnik sisamanik makkuninnga katitigaavoq: Air Alpha, Profil Rejser, Albatros Travel aamma Topas Adventure Travel.

Nalunaarummi pineqarpoq, Arctic Travel Group ukioq manna oktoberip ulluisa 14-iata tungaanut ingerlatseqatigiiffik pillugu inatsisitigut aningaasaqarnikkullu misissuinissamut kisermaassisussaatitaasoq, kingornalu Arctic Travel Group pisinissamut neqeroorummik ilimasaarummik saqqummiussissasoq. Naalakkersuisut maannamiit sapaatip akunnerisa marluk ingerlaneranni ingerlatseqatigiiffiup tuninissaanik isumaqatiginninniarnerit ingerlatiinnarnissaannik kissaateqarnertik aalajangiiffigissavaat.

Silaannakkut imaatigullu angallassinerit, aamma takornariaqarnerup aningaasartuutitigut siuarsarneqarnissaa Arctic Travel Group-ip isumagisarilissavaa.