Hans Enoksen-ip tunuaqqusaanera sunniuteqarnavianngilaq
Siumup Nuup Hans Enoksen-imik tunuaqqusinerat Hans Enoksen-imut sunniuteqangaarnavianngitsoq, Sermitsiami aaqqiusuisup nalilerpaa.
Nunatta nutaanik tatigineqarsinnaasunillu naalakkersuinikkut siulersuisoqalernissaa piumasaralugu, Siumut Nuuk arfininngormat tusagassiutinut nalunaaruteqarput Hans Enoksen ingerlaannartumik tunuaqqullugu, partiillu siulittaasuinut tulliusut tassalu Jonathan Motzfeldt Doris Jakobsen-ilu partiip siulersorneqarnera siuttuuffigilissagaat.
Siumup Nuup piumasaa Hans Enoksen-imut aatsaat sunniuteqarsinnaavoq, partiip immikkoortortaqarfii allat assinganik piumasaqarpata, Sermitsiami aaqqissuisuuneq Poul Krarup oqarpoq.
-Siornatigut Siumut Nuuk isornartorsiuigaangami siunniuteqangaarneq ajorpoq. Massakkulli pisut allaalluinnaapput, naalakkersuisut akornanni ilassinnissutinik sippuisoqarnera kukkusumillu atuisimanerat pissutigalugit. Taamaammat Siumup immikkoortortaqarfiisa Nuuk Siumup piumasaa tapersersinnaavaat.
Poul Krarup-illu naatsorsuutigivaa Hans Enoksen-ip qinigaaffik tamaat naalakkersuisut siulittaasuattut issiaannarniarsarinissani, aatsaallu ukiakkut 2006-imi qinersisoqassasoq.
-Apeqqutaavorli naalakkersuisooqataasut Inuit Ataqatigiit issiaannartissaneraat, pisorlu eqqarsaatigalugu imaassinnaavoq juullertinnagu qinersisugut, Poul Krarup oqarpoq. Nangillunilu oqarpoq Josef Motzfeldt Sermitsiamut apersorneqarnermini oqaatigaa, aningaasaqarnermut inatsit 2006-moortoq inatsisartuni ilaasortat amerlanerussuteqarluartut tunuliaqutaralugit akuersitinneqarnissaa anguniarlugu. Imatut paasineqarsinnaavoq taanna angoreeruniuk Siumumik suleqarteqarnini taamaatissinnaagaa.
-Qanittumi pisut partiimi aalassatitsingaatsiarput, naatsorsuutigaaralu inatsisartut ataatsimeereerpata qinersissasugut, Poul Krarup oqarpoq.