Hans Enoksen: Innuttaasut paasisitsiniaavigineqarnissaat aningaasanik soorunami naleqassaaq

Naalakkersuisut Nunatta Namminersulernissaa pillugu aappaagu paasisitsiniaaniarput, aningaasallu atugassat ilaat Inatsisartunit akuersissutigeqqaarneqassapput.

Nunatta Namminersulernissaa pillugu Naalakkersuisut innuttaasunut aappaagu paasisitsiniaaniartut Naalakkersuisut siulittaasuata Hans Enoksenip oqaatigaa.

Namminersorneq pillugu Isumalioqatigiissitat isumaliutissiissutaat tunniunneqareerpat, kommunerujussuanngortussanullu apriilip arfineq-pingajuani qinersisoqareerpat paasisitsiniaanerit aallartissasut Hans Enoksenip oqaatigaa:

- Tamakkiisumik atsiorneqareerpat aatsaat innuttaasunut tuniniartussanngussavarput, Inatsisartullu aappaagu ukiukkut ataatsimiinneranni suliaq naammassissagipput naatsorsuutigaara, ingerlaannarlu paasisitsiniaasoqarnissaa aallartissalluni, Hans Enoksen oqarpoq, nangipporlu:

- Innuttaasut tamarmik paasitinneqarnissaat soorunami akeqassaaq, innuttaasullu tamarmik paasitinneqarnissaat uagutsinnut pingaartorujussuulluni. Aningaasat Namminersorneq pillugu allattoqarfimmut atugassat qaavatigut allanik qinnuteqarpugut, Inatsisartut akuersissutigeqqaagassaannik. Partiit tamarmik sunniuteqarluarlutik paasisitsiniaaqataasinnaapput, soorunalumi Naalakkersuisut paasisitsiniaanermut annertuumik peqataassapput, Naalakkersuisut siulittaasuat Hans Enoksen oqarpoq.

Namminersorneq pillugu allattoqarfik 4,2 millioni koruunit sinnilaarlugit aappaagu aningaasaliiffigineqassasoq naalakkersuisut siunnersuutigaat, paasisitsiniaanermullu aningaasartuutissat tassanngaanniit tiguneqassapput, soorluttaaq naalakkersuisut angalanissaminnut kontoannit aningaasartuuteqartoqartassalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat