Hans Enoksen: Ineqarnermi akit qaffassanngillat

Naalakkersuisut siulittaasuata Hans Enoksenip inatsisartut ukiaanerani ataatsimiinnerat ammarlugu oqalugiarami toqqaannartumik oqarpoq, A/S INI-imi immikkut ittumik ataatsimeersuartoqarnissaa piumasaralugu, inissiaatileqatigiiffiup attartornermut akigititaminik qaffaaniarnera, piviusunngussanngitsoq aalajangerneqarniassammat. Illuatungaatigut A/S INI aningaasartuutikillisaasariaqartoq, Hans Enoksen oqarpoq.
Allattoq Jens Thorin
septembarip 19-at 2008 16:46

Hans Enoksenilli aallaqqaammut erseqqissarpaa, namminersorneq eqqunneqareerpat, aatsitassanik aqutsineq Nunatsinnit tiguneqartuni siullersaassasoq.

- Namminersorneq akuersissutigineqassappat nukinnik piffissamillu atuilluarnissaq qulakkeerniarlugu Naalakkersuisoqarfiit ataanni susassareqatigiiffeqartut ataqatigiiffeqartullu, tassaasut, aatsitassarsiornermut uuliasiornermut, suliffeqarnermut inuussutissarsiutinullu ilinniartitaanernut, nunanut allanut kiisalu inatsiseqarnermut nukittorsaavigineqassapput, Hans Enoksen oqarpoq.

- Aamma Nunatta qaquguugaluarnersoq Naalagaaffinngornissaanut piareersaasiornerit aallartinneqartariaqalersut. Matumani eqqarsaatigaara inatsisinik tunngaviusunik suliaqartussanik pilersitsinissaq, Hans Enoksen nangippoq.

Silap allanngoriartornera pillugu oqallinneq tikikkamiuk Naalakkersuisut siulittaasuat oqarpoq, Kyotomi isumaqatigiissutip taartissaanut Nunarput atsioqataasariaqartoq.

Assersuutigalugu eqqaavaa, Alcoap alumiumik aatsitsiviliortussappat, nunarsuarmi tamarmi CO2-mik aniatitsineq katilluni millisussaasoq, erngup nukiga iluaqutigineqasammat.

Hans Enoksen–ip kommuninik iluarsaaqqinneq aamma iserfigaa eqqaallugu, suliassanik nussuinissaq kingusinnerusukkut pissasoq, kommuniulersussat sisamaasut ilaasa kissaatigigaat.

Naalakkersuisut siulittaasuata tamanna paasilluarsinnaavaa erseqqissarluguli, suliassanik kommuninut nussuinissaq iluarsaqqinnermut tunngaviulluinnarmat.

Aalisarneq pillugu inatsisissaq suli utaqqisitsissaaq.

Naalakkersuisulli aalisarnermut ataatsimiitsitarsuarmik pilersitsisimapput, nalilerneqassalluni siunissami Nunatsinni aalisarnikkut sinaakkusiussat qanoq isikkoqassanersut.