Hans Enoksen ilaasortaajunnaarnera siulittaasup tulliata tupassutigaa
Siumup Inatsisartuni gruppiata siultittaasuata, Jens Immanuelsenip, Hans Enoksenip Siumuminngaanniit ilaasortaajunnaarnera tupaallaatigisorujussuuaa.
Hans Enoksenip taama aaliangersimanera ataqqisariaqarpoq, Jens Immanuelsen oqarpoq, allamilli oqaaseqarumanani.
Siumut siulittaasuata tulliata Karl Lyberthip aamma ilimagisimanngikkaluarpaa parteeqatittoqqani Siumumit anissasoq.
- Siullermik upperinngilara. Taanna unneqqarissumik oqaatigissavara. Kisianni ilumoorpat, taamaassimappat, assorujussuaq tupaallaatigaara aamma ajuusaarutigalugu taamatut iliornera, Karl Lyberth oqarpoq.
Hans Enoksen ukiut arfineq pingasut Siumumi siulittaasuuvoq. Taassumalu ataatsimiissitaliarsualionerata kingorna Nunarput namminersornernermut ikaarsaarpoq.
Siumumilu siulittaasup tulliata Hans Enoksen partiimit aninera ajuusaarutigisorujussuuvaa.
- Siumumi kammalaatigigatsigu. Inuttut aamma politikeritut kammalaatigigatsigu taamaattumik assorujussuaq tupaallannarpoq. Partiiminngaanniit ilumut anippat, taamaassimappat, taava oqarnittut tupaallannartorujussuuvoq. Ilumut naatsersuutigisimanngikkaluarpara taamaattoqassasoq aammalu uggornarpoq taamatut pisoqarsimasoq, Karl Lyberth oqarpoq.
Hans Enoksenip Siumumit aninerata kingorna partii politikkikkut ingerlariaasia nalilersoqqittariaqarnersoq, Karl Lyberth aperigatsinni akivoq, partiit tamarmik politikkertik nalilersortuartariaqaraat, kisianni Siumut politikkikkut ingerlanermisut ingerlaannassasoq.
- Naalakkersuisuni isumaqarpugut, naalakkersuisunngornitta kingornatigut, ajunngitsumik ingerlatsisimalluta aamma inuiaqatigiinnik pitsaanerpaamik siunertaqarluta soorunami ingerlatsisimalluta. Taava aamma pitsaasumik kinguneqartumik ingerlatsilluta qularinngilara, Karl Lyberth oqarpoq.
Aamma Kristian Jeremiassenip Hans Enoksen Siumumit aninera ullumi aatsaat tusarpaa, taamaakkaluartoq parteeqatimitulli tupaallatsiginngilaq.
Hans Enoksenip naalakkersuisut politikkiat sivisuumik iluarisimanngikkaa Kristian Jeremiassen oqarpoq.
- Killissani angusimassaavaa, taanna oqarpoq.
Kristian Jeremiassenittaaq naalakkersuisut politikkikkut suliaasat ilaat aamma iluarinagu oqaatigaa.
Aleqa Hammond oqaaseqartinniaraluarparput iluatsinnaguli.
