Hans Enoksen-i Great Greenland-ip pisortaanut pasiulliutinut akulerunnianngilaq.
Great Greenland-imi aningaasaqarnermut pisortaasimasoq oqarpoq, Great Greenlandip pisortaa Canadami puisit amiinik pisisarnermi amigartoorutaasartut siulersuisunut isertuunneqartartut. Taamaakkaluartoq Naalakkersuisut siulittaasuata Hans Enoksen-ip aalajangiusimavaa puisit amiinik tapiissutinut tunngasut kisimik misissuiffigineqassasut.
Jacob Abelsen Great Greenland-imi 2002-miit 2005-imut aningaasaqarnermut pisortaasimasoq, Hans Enoksen-imut ammasunik allagaqarluni allappoq, Canadamiit puisit amiinik ammeriviup pisisarnerini amigartoorutit aqutsisuniit isertuunneqartartut, aammalu ammeriviup ataannarnissaa ajoquserneqarsinnaammat piniartut inuussutissarsiutaat ulorianartorsiortinneqartoq.
Hans Enoksen oqarpoq siulersuisut avaqqullugit iliuuseqarnissamut pisinnaatitaanani:
- Aalajangiusimavara tapiissutinut tunngasunut misissuinerit ingerlanneqassasut. Inunnut tunngasunut misissuinissaq uanga peqataaffiginianngilara. Allakkat siulersuisunut oqaseqarfigineqartussanngorlugit ingerlatinneqareerput, tassalu siulersuisut akissuteqarnerat tunngavigalugu qanoq alloriartoqarnissaa paasinarsiumaarpoq. Uagut siulersuisut avaqqutiinnarlugit akuliunnissamut pisinnaatitaanngilagut, Hans Enoksen oqarpoq.
Hans Enoksen aamma oqarpoq siulersuisut misissuinissaq pisariaqartikkunikku pisussaasut piginnittunut ilisimatitsissallutik.
Hans Enoksen isumaqarpoq suliffeqarfinni sulisimagaanni nipangersimasussaatitaaneq atuuttoq, aamma tamanna Great Greenlandip aningaasaqarnermut aqutsisorisimasaanut atuuttoq:
- Taamaattumik tamanut ammasumik allagai uanga aallaavigivallaarusunngilakka, taamaattumillu aamma allakkat taakku siulersuisunut ingerlateqqinneqarput, taakkulu pisussaaffigivaat qulaajaassallutik, Hans Enoksen oqarpoq.
Hans Enoksen naggataatigut oqarpoq imaanngitsoq taakku allakkat upperinnginnamigit iliuuseqarniarnani; kisiannili siulersuisut kisimik piginnaatitaaffeqartut iliuuseqarnissamut.
