Hans Enoksen Folketingimiilerusuttoq

Folketingimut qinigassanngortittut tamarmik aqqisa allattorsimaffiat piareertoq Rigsombudsmandimit nalunaarutigineqarpoq.
66-inik ukiulik, Hans Enoksen Folketingimut qinigassanngortippoq. Assi © : KNR / Malik Brøns
Allattoq Christine Hyldal
oktobarip 21-at 2022 15:39

Kalaallit politikerit Folketingimiilerusuttuut allattorsimaffiat piareerpoq.

Taakkunannga 14-it qinigassanngortinnertik nalunaarutigereerpaat – allattorsimaffillu atimik nutaamik ilaqarpoq: Tassa nunatsinni politikeritoqaq – 66-inik ukiulik Hans Enoksen Naleqqameersoq.

Taanna Naleqqami 2014-imi pilersitseqataaffigisamini aamma siulittaasuunikuuvoq.

Taannali aasaq siulittaasuujunnaarpoq. Erngertumik tunuarnera ”inuttut atukkanik pissuteqartoq” taamani nassuiaatigineqarpoq.

Aasap ingerlanerani kingusinnerusukkut Qeqqata Kommuniani kommunalbestyrelsimut uteqqinniarluni qinnuteqarpoq. Politikeritoqarmi siorna kommunimut qinersisoqarneranut atatillugu qinigaanikuuvoq. Taassumali Inatsisartuni sulinera ilaatigut siulittaasuunera pissutaallutik Hans Enoksen kommunalbestyrelsimit piffissaligaanngitsumi sulinngiffeqarniarpoq.

AAMMA ATUARUK Hans Enoksen partii siulittaasuattut tunuarpoq

KNR-ip Hans Enoksen oqaaseqartinniarsaraa, tamannali suli iluatsinngilaq.

Naleqqap siulittaasorisimasaa Siumumi ilaasortaanermini Naalakkersuisunut 2002-mit 2009-mut aamma siulittaasuuvoq.

Hans Enoksenilu Inatsisartuni marloriarluni aamma siulittaasuuvoq.

Nunatsinnit politikerit katillugit 15-it Folketingimut novembarip aallaqqaataani qinersinissamut sassarput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk