Hans Enoksen: Finn Karlsen utoqqatsertariaqarpoq
Aalisarnermut Piniarnermullu naalakkersuisoq Finn Karlsen, Great Greenlandip puisit amiinut tapissuteqartarnera pillugu misissuisitsinermut oqaaseqarsimanini tunngavigalugu Great Greenlandimiunut Namminersornerullutillu Oqartussani atorfilittanut naalakkerasuisunullu utoqqatsertariaqarpoq, taama oqarpoq naalakkersuisut siulittaasuat Hans Enoksen naalakkersuisunik immikkut ittumik ullumi ataatsimiititsereerlunilu.
- Oqaaseqarnera assut ilungersunarpoq pingaartumik nalunaarusiaq naalakkersuisunit tusaatissatut tiguneqarmat, akuerineqarluni tusagssiorfinnullu nalunaarutigineqarluni naammssineqarmat.
- Kisianni Finn Karlsenip ulloqeqqanut oqaaseqarnera atorfilinnut upperinninngitsutut kukkunersiuisunik tatiginninngitsutut minnerunngitsumillu naalakkersuisooqatiminut taama nittarsaassinera uannut ilungersunartorujussuuvoq, taamaammat naalakkersuisut piaartumik ataatsimiigiaqquvakka.
Finn Karlsen tamanna pillugu naalakkersuisunit piumasaqarfigineqarpoq naalakkersuisoqatiminut atorfilittanut sulisunullu ammeriviup siulersuisuinut tunngatillugu oqarnini utertissagai utoqqatsissasorlu. Utoqqatserumanngippat suliaq ilungersunartorujussuanngussasoq Hans Enoksen oqarpoq.
Utoqaatserumannippat qanoq aaqqiisoqarnissaa pillugu naalakkersuisooqatigineqartut aappaat tassa IA, tamanna pillugu oqaloqatigineqassasut Hans Enoksen aamma oqarpoq, oqalunilu Finn Karlsen Great Greenlandimut tunngasunik siunissami oqaaseqarsinnaanera killilertuaannarsinnaanngikkini, Great Greenland naalakkersuisoqarfiata ataaniimmat.
Karlsenip Great Greenlandimi sulisunut pissutsinik saqqummiusseqqusilluni kaammattuuteqarsimanera Enoksenip aamma ilungersunartuunerarpaa.
- Ilungersunarpoq naalakkersuisuni ilaasortaq inuiaqatigiinnut taama nalunaaruteqarmat “ajortunik ilisimasaqarussi saqqummerniaritsi ersiunnaarlusi”. Taamatut pissuseqartussaanngilagut, soorunami ajortoqarsimappat ilisimaarinnittut politiinut sukkulluunniit periarfissaqarput unnerluutiginninnissaminnut.
