Hans Enoksen: DF nunasiaateqarniartutut eqqarsartut

Allat saammaannerannit inuunissamit atugarissaarneq minnerusoq pilerinarneruvoq.

Nunatsinni naalakkersuisut siulittaasuat Hans Enoksen nunatta siunissami namminersuleriartorneranut sulineq pillugu taama oqarpoq.

- Qularnanngitsumik inuuniarnikkut atukkavut eqqorneqassapput. Kisianni kalaaleqatima pilliuteqarusunnissaat qularutiginngilara, politiken.dk-mut taama oqarpoq.

Taama oqarpoq namminersorneq pillugu isumalioqatigiissitarsuarmi suleqatigiit uuliasiornermit isertitassat pillugit isumaqatigiissinnaajunnaareersullu. Imami isumaqatigiinngitsigimmata aallaat sulineq kinguartittariaqalerluni. Tamatumunnga peqatigitillugu Dansk Folkepartiip Kalaallit Nunaata pisuussutinut uumaatsunut piginnittuulernissaa akerleraa.

Taamatulli eqqarsarneq Hans Enoksenip nunasiaateqarniarnertut taavaa. Matumani oqaatigaa Kalaallit Nunaannut atuagassarititaasut Savalimmiuniit ajornerusariaqanngitsut, taakkumi pisuussutiminnut uumaatsunut tamakkiisumik oqartuussaassuseqareerput.

Manna tikillugu Hans Enoksen aamma ministeriuneq Anders Fogh Rasmussen peqatigalugu isumalioqatigiissitarsuup sulinera tunuarsimaarfigisimagaluarpaa, taamaattorli Hans Enoksenip isumaqatigiinngittoqartuarpat akuliunnissi tunuarsimaarfiginngilaa.

- Maanna isumalioqatigiittarsuup eqqissilluni sulinissaa periarfississavarput. Perulluliornianngilagut. Kisianni isumalioqatigiissitarsuup sulinermini isumannaagassanni naammassisinnaanngippagit politikikkikkut akuliuttariaqariaqarpugut, Hans Enoksen oqarpoq.