Hans Enoksen: Ataatsimiititaliap Danmarkimi naalakkersuisut aqqutigeqqaassavai

Nunatsinni isumaginninnermut pissutsit iluarsiiffiginiarlugit Hans Enoksenip Folketingip Kalaallit Nunaat pillugu ataatsimiititaliaa toqqaannartumik suleqatigerusunngilaa. Ataatsimiititaliaq siunnersuuteqarusukkuni Danmarkimi naalakkersuisut aqqutigalugit tamanna apuunneqarsinnaasoq oqaatigalugu.
februaarip 27-at 2009 16:54

Nunatsinni meeqqat kaattut piaartumik ikiorsiiffigineqarnissaat anguniarlugu, Lars-Emil Johansenip suligasuartussamik suleqatigiissitaliornissaq ataatsimiititaliami siunnersuutigigaluarpaa.

- Inunnilli isumaginninnerup Nunatsinnit akisussaaffigineqalernerata kingorna annertuumik siuariartoqarsimavoq, sulilu iluarsiissutissat tulluarsarlugit aallartisarneqartuarlutik, Hans Enoksen oqarpoq.

Danmarkimi Kalaallit Nunaannilu naalakkersuisut akisussaaffinnik agguataarisimanerat ataqqillugu, ataatsimiititaliamiit isumalioqatigiissitaliorunik taakkua suliaat aallaavigalugit siunnersuutiginiakkatik, danskit naalakkersuisui aqqutigalugit apuussinnaavaat, Hans Enoksen Lars-Emil Johansenimut akissuteqarnermini ilaatigut taama allappoq.