Hans Enoksen: Aleqa Hammond salluvoq
- Hans Enoksen inatsisartunut ivertinneqarnermi kingorna aalisartunut pitsanngorsaataasinnaasunut tunngatillugu pingaartitaminik ataatsimilluunniit ajoraluartumik siunnersuuteqanngilaq, periarissaq atorsimanngilaa, Naalakkersuisut siulittaasuat Aleqa Hammond tusagassiortunik katersortitsinermi ippassap pisumi taama oqarpoq.
Hans Enoksen Naalakkersuisut siulittaasuata oqaasiinut akissuteqarluni ilaatigut ima kaammattuteqarpoq.
- Aleqa Hammond inissisimaffini imaannaanngimmat, pissuserissaarluni inuttut, inuit allat naleqassusiat eqqortumik oqaatigisassagaa, imaanngitsoq sallumik tunngaveqarluni inuiannut tusagassiorfinnullu inuit ajortisartariaqartut, taanna akuerinngilara, Hans Enoksen oqarpoq.
Hans Enoksen Siumut gruppeani Karl Kristian Kruse Nikolaj Jeremiassen peqatigalugit Naalakkersuisunut siunnersuuteqarnerisigut Paamiuni Sisimiunilu saattuarniarnerit aallarteqqinneqarput aamma Qeqertarsuup tunuani Uummannami Upernaviullu eqqaani qaleralittaseqqinnerit anguneqarput. Taakkua saniatigut Hans Enoksen paragraf 37 naapertorlugu aalisartut piniartullu atugaat pillugit naalakkersuiusunut apeqquteqaateqartarluni.
Hans Enoksen ilanngullugu oqarpoq, nammineq, Nikolaj Jeremiassen Karl Kristian Kruse-lu Naalakkersuisunut allassimallutik, Siumut innuttaasut piumasaqaataannut tusaanerulinngippat, namminneq partimiit ilaasortaajunnaarniarlutik.
Allakkalli taakkua Hans Enoksen naapertorlugu akineqarsimanngillalluunniit.
Hans Enoksen partii Siumumi ilaasortaajunnaarnini tallimanngormat 3 januar nalunaarutigivaa, maannalu partiimik nutaamik pilersitsiniarluni atsiornernik katersuisitsillutik Hans Enoksen oqarpoq.