Hans Enoksen: Air Greenlandimi piginneqatigiissutinik pisinissarput ammaffigaarput

SAS-ip Air Greenlandimut piginneqatigiissutini tunissallugit Sverigemi Stockholmimi ullumi aalajangerpoq.

Taamatut neqerooruteqartoqarnera naalakkersuisut siulittaasuata Hans Enoksenip soqutiginartinnerarpaa, SAS-illi Air Greenlandimut piginneqatigiissutai Namminersornerullutik Oqartussanit pisiarineqassappata piginneqatigiissutit nalingi paasiniarneqaqqaassapput nalilersuisoqaqqaassallunilu, naalakkersuisut siulittaasuat oqarpoq:

- SAS-ip Air Greenlandimik piginneqatigiissutini tuniniarai tusagassiorfitsigut ullumi tusarparput. Toqqaannartumik saaffiginnissummik tigusaqanngilagut, kisianni taamatut neqeroortoqassappat soqutiginarpoq, oqaloqatigiinnerilli aallartinneqassappata pisiassap nalinga ersarissumik paaseqqaassallugu uagut pingaartipparput, Hans Enoksen oqarpoq.

Namminersornerullutik Oqartussat Air Greenlandimik piginneqataareersuummata piginneqatigiissutinik pisiumasinnaanerat pissusissamisuuginnassasoq, Air Greenlandip pisortaanerata Michael Binzerip oqaatigaa, Hans Enoksenilu tamanna paasisinnaanerarpaa:

- Michael Binzerip taamatut tunngavilersuinera assortorneqarsinnaanngilaq. Piginnittuunerup annertusarneqarneratigut sunniuteqarnerulerluta inissisimassagatta, Hans Enoksen tunngavilersorpoq.

SAS Air Greenlandimik 37,5 procentimik piginneqataavoq.

Namminersornerullutik Oqartussat aamma 37,5 procentimik piginneqataalluni, danskillu naalagaaffiata piginneqatigiissutit sinneri, 25 procentit, pigai.

Aningaasat Air Greenlandip siorna kaaviaartitasa

1 milliardi koruunit sinnilaanngualaarpat, 75 millioni koruuninillu sinneqartooruteqarluni.