Hans Enoksen 50-iliivoq
Naalakkersuisut siulittaasuat Hans Enoksen ullumi 50-inik ukioqalerluni inunngorfimmini Itillimi inuuissiorpoq. Ukiut 50-it matuma siornagut 1956-mi aggustip arfineq aappaanni Itillimi Hans Enoksen inunngortoq, niuernerup iluani ilinniagaqartuuvoq, politikkimik suliaqarnermut 1970-kkunni 1980-kullu ingerlaneranni iseriartuaarsimalluni.
Hans Enoksen 1979-mi qinigaaqqaarpoq, tassa Itillimi ilagiit sinniisaannut qinigaalluni. Tamatuma kingorna Itillimi nunaqarfimmi aqutsisunut Sisimiunilu kommunalbestyrelsemi 1980-kkut naalerneranniit ilaasortaasareerluni Inatsisartunut 1995-imi qinigaavoq.
Enoksen 1997-ip 2001-llu akornanniit politikkikkut qaffakkiartupiloorsimavoq. Sisimiuni kommunemi qinigaanermi saniatigut 2000-mi nunaqarfiit peqatigiiffianni siulittaasutut qinigaavoq. Kanunupe-mi siulittaasooreerluni Kanukoka-mi 2001-imi siulittaasuutsiarpoq, siulittaasuunerminilli tunuartariaqarsimalluni piniarnermut aalisarnermullu naalakkersuisunngorami.
Hans Enoksenip politikkikkut ukioq 2001-i annertuumik alloriarfigaa, Siumut partiimi siulittaasunngorami, tamannalu inatsisartuni qinersinermi tullermi naalakkersuisut siulittaasussaattut inissitserneratut taasariaqarpoq, Enoksenilumi naalakkersuisuni siulittaasunngorpoq, Inatsisartunut 2002-mi qinersisoqarmat. Siulittaasuunermini atugai manerissorsiuinnarfiusimanngillat, tassa siulittaasuunerata nalaani Siumut naalakkersuisooqatiminik taarsiisarmat, ajornartorsiornerillu pissutigalugit Inatsisartunut siorna maanaannaq qinersisoqarmat, tamaattoq naalakkersuisut siulittaasuattut Enoksen inisseqqippoq.
Naalakkersuisut siulittaasuata inuuissiornermi partiimini naalakkersuisunilu immikkut malunnartinneqannginnissaa nammineerluni kissaatigisimavaa. Naalakkersuisut siulittaasuata nalliuttorsiutigineqarnissi piumanngikkaluaraa maannaanngiit 50-liisoq taamaattoq pilluaqquarput.
