ASSIT Hans Egedemut eqqaassutissaq serlersaarfigineqartoq

Nuummi nuutoqqap qaqqaata qaavaniittoq Hans Egedemut eqqaassutissaq påskekkunni innarlisaarisunit guldtiusumik qalipanneqarpoq.
apriilip 04-at 2015 11:40

Eqqaassutissap saavani arnanut ilisarnaammik qalipaasoqarsimavoq soorluttaaq oqaaseq 'utsuk' allanneqarsimasoq. Tunuanilu arnat angutillu ilisarnaataat qaleriissillugit qalipanneqarsimapput aammalu sanningasoq kussaqqasoq qalipanneqarsimalluni, taannalu Peterskorsimik taaneqartarpoq.

 

Nuup illoqarfianik tunngaviliisumut ajoqersuiartortitamut eqqaassutissaq aatsaat siullerpaamik serlersaarfigineqalinngilaq. 2012-mi kingullermik serlersaarfigineqarpoq taamani qalipaammik aappalaartumik qalipanneqarpoq kisitsisillu 666 allanneqarlutik.

 

Arfininngornerup ullaavaniit kommunimi sulisut eqqaassutissaq qalipaataajarlugu aallartippaat.