Atsiornernik katersisup Ria Sivertsenip Hans Egedemut eqqaassutissaq katersugaasivimmiilernissaa siunertaraa. Eqqaassutissaq juulip 30-ani 1922-mi uleerneqarpoq.Assi: Ane-Marie Petersen/KNR

Hans Egedemut eqqaassutissaq peeqqullugu atsiornernik katersisoqartoq

Kalaallit nunasiaataasimanerannut eqqaassutissaq qaqqap qaavaniissanngimmat, taanna katersugaasivimmiittariaqartoq, atsiornernik katersisoq isumaqarpoq.

"Nunasiaatillit nersorunnaarniarsigit". "Tamaaniittussaanngilaq". "Taasuma angutip illoqarfiga nunaralu nittarsaattussaanngilai".

Hans Egedep eqqaassutissaa Nuummiittup peerneqaqqullugu atsiornernik ilinniarnertuunngorniaq katersivoq. Atsioqataasullu ilaat taama oqaasertaliipput.

19-inik ukiulik Ria Sivertsen Nuummi ilinniarnertuunngorniartoq atsiornernik katersisuuvoq.

Hans Egedemut eqqaassutissaq Nuummiittoq inuiattut ullorsiornitta ullaassaani serlersaarneqarpoq. Eqqaassutissaq qalipaammik aappalaartumik kuerarneqarsimavoq, inuit kakiornerannik titartaavigineqarluni "decolonize"-millu - tassa nunasiaataajunnaarneq - allaffigineqarsimalluni.


19-inik ukiulik Ria Sivertsen atsiornernik katersivoq.

Taamaaliortoqareermat ajoqersuisoq 1721-mi nunatsinnukartoq pillugu oqallittut imaaginnavipput.

- Isummat assigiinngitsorpassuit Facebookikkut malinnaavigaakka. Amerlasuut eqqaassutissap peerneqarnissaa isumaqataaffigaat, Ria Sivertsen oqarpoq, eqqaassutissallu katersugaasivimmiinnissaa tulluarnerunerarpaa.

Meeraanermini allatut oqaluttuunneqartartoq

Palasip ajoqersuisullu danskinit norskinillu kingoqqisup ullorsiutaasa atuareernerisa kingorna tassunga isiginninnini allanngorsimaqisoq oqaatigaa.

"Sooruna taama niaqulaartigaasi allaat angakkut upperalugit, uffa nalunagu iluaqutaanngitsut. Sooruna qaamanerani takusinnaasatsinnik angakkorsartanngitsut?"

Atuakkami "Den arktiske koloni"-mi 2017-imi saqqummertumi Hans Egedep allagai taama ittut atuarneqarsinnaapput.

"Angakkorsassaanngikkussi toqussavatsigit nunarsuarmit piuneerullusi, guutimmi taamaattut toqunneqaqquai"

Ria Sivertseni Hans Egede pillugu meeqqat atuarfiani allatut ilinniartinneqarpoq. Tassa nunatsinnut ajoqersuiartortuusoq taannaqanngikkaluarpallu kalaallit killiffipput maanna allaanerujussuusimassagaluartoq.

- Taamani uanga ilinniartinneqarpunga qujamasussasunga ataqqissagingalu, Ria Sivertsen oqarpoq.

Oqaluttuarisaaneq eqqortumik oqaluttuarineqassasoq

Taassuma Hans Egede pillugu meeraalluni tusartakkaminit inersimasunngorluni paasisai allaanerupput. Hans Egedemullu eqqaasutissaq qaqqap qaavaniittoq takunerit tamaasa qanga kalaallinut iliuuserisimasai maanna eqqaasarpai, taamaammat taamani pissutsit qanoq issimanerisa eqqortumik oqaluttuarineqartalernissaat anguniarpaa.

Atsiornernik katersinikkut upperisap atuukkunnaarnissaanik siunertaqanngitsoq aamma oqarpoq.

- Naalangiartarnerit juullisiortarnerit ilaalu ilanngullugit unitsinnissaat siunertarinngilara, Ria Sivertsen naggasiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat