Hans Aronsenip saqqummiussaa KNAPK-p akuersaarneqarsinnaannginnerarpaa
Hans Aronsenip KNAPK-p siulersuisuisa naalakkersuinikkut aaliangiussassanut peqataanerusariaqarneranik Radio aviisimi ippassaq uparuaanera KNAPK-p siulitaasuata sakkortuumik akissuteqarfiginiarpaa.
- Pisoq demokratiimik inaarliineruvoq, Leif Fontaine oqarpoq.
Tamannalu ima tunngavilersorpaa.
- Nalunngisatsitummi aalisarnermut ataatsimiitsitaliami ilaasortat affangajaasa siunnersuutiliarineqartoq isumaqataaffiginngilaat, aamma ataatsimiitsitaliami siulittaasutut taama oqaaseqarnera oqartussaaqataanermik innaarliinertut isigaara, Leif Fontaine oqarpoq.
Aalisarnermut ataatsimiititaliap saqqummiussai tunngavigalugit maanna naalakkersuinermi inatsisissamik siunnersuutiliortoqarpoq.
Ataatsimiititallu sulinerani apeqqutit arlaqartut KNAPK-mit isumaqataaffigineqarsimanngitsut, Leif Fontaine oqarpoq.
Maannalu siunnersuutiliarineqartumi nutaami ataatsimilluunniit aalisartut piniartullu tusarniaaffigineqarsimanngillat, tamannalu KNAPK-mut sunniuteqarnerlussinnaavoq.
- Tamatut isikkoqartillugu siunissaq eqqarsaatigalugu KNAPK-p aningaasaqarneranut ilaasortaanullu navianartorsiortitsisinnaavoq, Leif Fontaine oqarpoq.
Hans Aronsennillu ippassaq radioaviisimut saqqummiussaqarnera pillugu siulittaasoq ima oqarpoq:
- Hans Aronsenip taamatut avammut saqqummiussinera tusaatissatut tiguneqarsinnaavoq, kisianni akuersaarneqarsinnaanngilaq Ataatsimiititaliaq ataatsimilluunniit KNAPK-mut attuumassuteqanngimmat, Leif Fontain naggasiivoq.