Hannoverimi 50.000-it qimagussortinneqalersut

Tyskit illoqarfiisa ilaanni Hannoverimi innuttaasut 50.000-it missaanniittut angerlarsimaffitsik akunnerit arlallit sapaammi qimattariaqassavaat.

Qaartartut tallimat sorsunnersuup aappaata nalaaneersut qaartissinnaajunnaartinneqassammata, inuit qimagussortinneqartariaqartut, tv-qarfik BBC paasissutissiivoq.

Illoqarfiup innuttaasui qulerarterutai sunnerneqassapput, Tysklandimilu suliani taama ittuni una annersaraat.

Qimagussuineq aqagu sapaammi ullaakkut qulingiluanut pissaaq. Pisattat pisariaqartitat, soorlu nakorsaatit, nassarneqassasut, pisortat tamanut kaammattuipput.

Qimagussortinneqartulli susassaqartinneqassapput. Katersugaasivimmut takornariartitsisoqassaaq, meeqqanut isiginnaagassiaqassaaq timersuutinillu aaqqissuussisoqassalluni.

Taavalu aamma suppimik silami sassaalliisoqarumaartoq, tyskit nutaarsiassaqartitsiviat dpa allappoq.

Hannoveri timmisartunit sorsuutinit sorsunnersuup aappaani qaartartumeerneqaqattaarpoq. Inuit tusindtilikkaat toqutaapput illoqarfillu tamangajaat suujunnaarsinneqarluni.

Qaartartullu taamani qaanngitsoorsimasut maanna qaartissinnaajunnaartinneqarniarput.