16-inik ukiulik, Aka Jensen Kinami illoqarfissuarmi millioninik innuttaasulimmi atuarpoq, illoqarfissuarmi tassani inuit coronavirusimik aamma tunillatsissimapput.Assi: Privat

Hanne 16-inik ukiulimmut Kinamiittumut anaanaasoq: Maannakkut angerlalermat nuannaarpunga

Hanne Sørensenip pania Guangzhoumi atuarpoq. Taanna Nuummut juunimi angerlartussaagaluarpoq, coronali pissutigalugu Københavnimut sisamanngorpat aallartussanngorpoq.

Hanne Sørensen tallimanngornerup unnuaa sinippianngilaq. Paniatami Kinami najugaqartup unnuaa ataatsinut nalunaaruteqarfigaa.

16-inik ukiulik, Aka Jensen Kinami illoqarfissuarmi millioninik innuttaasulimmi atuarpoq, illoqarfissuarmi tassani inuit coronavirusimik aamma tunillatsissimapput.

Coronavirusi
- Coronavirusimik tunillatsissimasumik siumueqqaarneq siorna decembarip ulluisa arfineq-pingajuanni pivoq.

- Nualluut coronavirusi inunnit Kinami illoqarfiit ilaanni Wuhanimi aalisagaarniarfimmiissimasunit - coronavirusillu siaruaaffianiigunarsimasunit - tuniluutilerpoq.

- WHO-p coronavirusi nunarsuarmi peqqinnissakkut ajornartoorfiusutut 2020-mi januaarip ulluisa 30-anni nalunaarutigaa.

- Coronavirusi inummiit inummut attaveqarnikkut tuniluuttartoq nappaammut SARS-imut assersuunneqarpoq.

- Inuit coronavirusimik tunillatsissimasutut nalunaarsukkat 20.679-iupput.

- Coronavirusip Kinami tuniluunnerata saniatigut nunanut allanut 24-nut ilaatigut Sverigemut siaruaassimasutut nalunaarsorneqarpoq.

- Inuit coronavirusimik toqquteqarsimasut 427-upput, taakkunani ataaseq Filippinerini toquvoq, sinnerilu 426-usut Kinami toqullutik.

- Qallunaat qulit Hubeimiit coronaviruseqarfiusumiit Danmarkimut qimagussorneqarput. Qimagussorneqartuni marluk tunillatsissimanermut ilimanaateqartutut nalilerneqarmata angerlarsimaffimminnit aneqqusaajunnaarallartitaapput.

Paasissutissanik pissarsiffik: Statens Serum Institut, Det Europæiske Center for Sygdomsforebyggelse og -kontrol, DR 

16-inik ukulik, Aka juunimi aatsaat angerlartussaagaluarpoq – coronali pissutigalugu timmisartumik februaarip arfernani Københavnimukassaaq. Akap anaanaminut Nuummiittumut tallimanngornerup unnuaani ataatsinut nalunaarutaa tassunga tunngassuteqartoq, Akap Kinami atuarneranut aaqqissuisut angajoqqaavinut nalunaarutigaat.

AAMMA ATUARUK Ataatsimiititaliaq sulilerpoq: Coronavirusip nunatsinnut annguteratarnissaanut upalungaarsimavugut

- Aliasuppoq. Angerlarusunngilaq, annilaaqaluni eqeersoorsimasoq, Hanne Sørensen oqarpoq.

- Aka nalunaaruteqarniarluni qialluni nipimik immiussisimavoq. Nipi tusaagakku aallaqqaammut tunillatsissimasorileraluarpara. Uissuummerujussuarlunga tupalaarpunga, anaanaasup qisuariaatini siulleq oqaluttuaraa. Immiussarli tusarnaaqqeriaramiuk susoqarnera paasivaa.

- Angerlalersoq tusarakku nuannaarpunga. Ernumagamimi. Kisianni aamma aliasunnera aliasuutigaara.

Qaammat ataaseq angerlarsimaannartoq

Qammat kingulleq Aka Jensenimut pissanganartorsiorfiuvallaanngikkaluarpoq. Taannami Wuhanimit 1000 kilometerinik ungasitsigisumi Guangzhoumi angajoqqaarsiamini najugaqarpoq. Coronamik tuniluuttoqarnera Wuhanimi aallaaveqarpoq. Guangzhoumili aamma tunillatsissimasoqarluni.

- Guangzhoumi 100-t missaanniittut tunillatsissimasut sapaatit-akunnialui matuma siorna paasivarput. Illoqarfissuuvorli 13 millioninik innuttaasoqartoq, Hanne Sørensen oqarpoq.

AAMMA ATUARUK Qallunaat marluk Hubeimit tikittut aneqqusaajunnaartut

Taamaakkaluartorli Aka Jensen nappaat pissutigalugu qaammat ataaseq mattussaaqqavoq. Akap ilaqutariit najugaqarfigisaata aneqqunngilaat. Anissagunilu kiinamigut assiaquteqaqqusaalluni. Ilaqutarsiarisaatali uivertoqarnera eqqisisimaffigigaat, Hanne Sørensen oqarpoq.

- Seven Elevenimit sodavanditorusukkaangat ilaqutarsiaasa aalliuttarpaat.

- Ullut tamaasa angerlarsimaannarluni tv-kkut isiginnaarujuuginnartarpoq. Aamma atuartitsisoqanngilaq.

Aalajangiineq ajunngilluinnartoq

Qammat kingulleq uannut annilaanganaqaaq, panigami tunillatsikkusunngilara – tamannalu eqqarsaatigingaatsiarpara. Virusi silaannakkut tuniluuppoq, Hanne Sørensen oqarpoq.

Aka Jensenillu Københavnimut timmisartumut ilaalluni aallarnissaanut ullualuinnanngorput. Nuummullu angerlartinnani sapaatini akunnialunni Københavnimeeqqaarnissaa arnaata aalajangerpaa.

- Pisoq AFS-imit iliuuseqarfigineqarluartorujussuuvoq. Panima paarilluarneqarnera qularinngilara. Pisorlu ilungersunarluinnartoq isumannaannissaallu tamanit pingaarnerusoq maanna aalajangerpaat.

- AFS-ip Kinamiittunik tamanik angerlartitsinissamut aalajangiinera ajunngilluinnarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat