Hampinik naatitsisartut ikuallatsitsisimasutut pasineqarput

Orpippassuit Californiap kujasissortaaniittut ikuallattuarsinnarput, ikuallannerillu sumi aallartissimanersut maanna eqqoriarneqarpoq. Tassami hampinik naatitsisartut Mexicomeersut ikumaartitsinerminni ikumaartitartik qaminngitsoorsimassagaat eqqoriarneqarpoq.
Allattoq Mads Lynge
aggustip 16-at 2009 16:20

Mexicomiut nunami eqqissisimatitamut maanna qimaasimassasut Santa Barbarami politiit ilimagaat. Aviisimi L.A. Timesimi taama allaaserinnittoqarpoq.

Politiit sapaatip-akunneri kingullerni ulappupput, Mexicomiut naatitsiviisa matuneqarnissaat pillugu ulappukkamik.

Orpippassuit maanna ikuallattut tassanngaanniit aallartissimassangatinneqarput. Tamaani nerisassiortoqarsimaneranik takussutissaqartoq oqaatigineqarpoq, ikuallannerillu tamaanngaanniit aallartissimanissaat qularutigineqanngilaq.

Orpippassuit nunami eqqissisimatitami Los Padres National Parkimi ikuallapput, ikuallannerlu taaguuserneqarsimavoq La Brea.

Orpippassuit 340 kvadratkilometerit maannamut ikuallareerput, inuillu tamaaninngaanniit qimagussorneqareerlutik.

Ikuallanneq qaminniarneqarpoq, sulili iluatitsivallaartoqarani. Ikuallannerit siammarsimapput, ikuallaffiillu katillutik aqqaniliullutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq