Hans Egedemut Nuummi eqqaassutissaq pillugu aasaq oqallinnerup nunatta nunasiaasimaneranik akuerinninnissap ukkanneqarnissaata suli pisariaqarneranik ersersitsoq, Aleqa Hammond isumaqarpoq.Assi: Helle Nørrelund/KNR

Hammond: Saammaateqatigiinnissamik suliaq suli aallunneqartariaqarpoq

Aleqa Hammondip saammaateqatigiinnissamut isumalioqatigiissitaliornissaq 2013-imi siunnersuutigaa. Saammaateqatigiinnissamik sulinerup timitalerniarnera unittooqqasoq, taanna isumaqarpoq.

- Saammaateqatigiinnissamik suliap naalakkersuinikkut unitsinneqarsimanera uninngatinneqarneralu ajuusaarnartorujussuartut isigaakka.

Aleqa Hammond Saammaateqatigiinnisamut Isumalioqatigiissitap suliunnaarneraniit nalunaarusiaminillu naalakkersuisunut saqqummiussineraniit ukiut pingasungajaat qaangiutereersullu taama oqarpoq. 

Taanna Inatsisartuni Nunatta Qitornai sinnerlugit maanna ilaasortaavoq. Saammaateqatigiinnissamut Isumalioqatigiissitaq naalakkersuisunut Siumumullu siulittaasuutilluni 2013-mi pilersippaa.

Isumalioqatigiissitap sulinerata kingunerisaanik nunatta nunasiaasimanerata kingunerisa iliuuseqarfiginissaannut nunasiaasimaneratalu akuerinissaanut nalunaarusiamik inassutinik imalimmik tunniussisoqarnissaa taamani naatsorsuutigisimavaa.

Taama KNR-imut 2013-imi ilaatigut oqarpoq. Isumalioqatigiissitap nalunaarusiaminik arfineq-marlunnik inassuteqarfiusumik naalakkersuisunut tunniussineraniit ukiut pingasungajaat qaangiutereerput. 

Assersuutigalugu nunatsinni oqaluttuarisaanermut saammaateqatigiinnissamullu ilisimasanik katersuivimmik pilersitsinissaq, saammaateqatigiinnermut aningaasaateqarfimmik pilersitsinissaq nunattalu oqaluttuarisaanerata nammineq oqaluttuarinissaanut periusissiornissaq inassutigaa.

Inassutai nuannaarutigigai

Saammaateqatigiinnissamut Isumalioqatigiissitaq Aleqa Hammondip oqarnera naapertorlugu ingerlariaqqinnissamut najoqqutassiorluarsimavoq.

- Apeqqutit tamanut pingaaruteqartorujussuit isiginngitsuusaaginnarneqarnerat naalakkersuinikkut siuttoqannginnermik ersersitsivoq, taanna oqarpoq itisiliillunilu:

- Inassutai nuannaarutigisorujussuuakka. Aamma naalakkersuisut siulittaasuta naalakkersuisullu sinneri kingorna timitalerlugit malitseqartinneqarnissaannut piumassuseqarnissaat neriulluarfigisimavara. Inassutaali timitalerneqarnissaannut tamaviaartoqarneranik maannamut suli takusaqanngilagut.

Ilinniartitaanermut, Kultureqarnermut Ilageeqarnermullu Naalakkersuisoqarfik Saammaateqatigiinnissamut Isumalioqatigiissitap inassutaanik malitseqartitsinissamut akisussaasuuvoq. Saammaateqatigiinnissamut Isumalioqatigiissitap inassutai nunatta nunasiaasimanerata akuerinissaanut tunngammata pingaartikkini, naalakkersuisoq Karl Frederik Danielsen KNR-imut allakkatigut akissummini erseqqissaavoq. Malitseqartitsinissamullu sulileruttorlutik, aamma allappoq. 

- Inassutit pilersaarutaareersunut attuumassuteqarmata ilaannik malitseqartitsoqarniarlereertoq, akissummini ilaatigut aamma allappoq. 

Ukkanneqartuarsinnartoq

Hans Egemut Nuummi eqqaassutissaq pillugu aasaq oqallinnerup nunatta nunasiaasimaneranik akuerinninnissap ukkanneqarnissaata suli pisariaqarneranik ersersitsoq, Aleqa Hammond isumaqarpoq.

- Nunasiaasimanermi pisut tamaasa kamammik asorerterinermillu taarserneqaratillu saammaateqatigiinnissamut tunngaviussanngillat. 

- Nunatta oqaluttuarisaanerani aqqusaarsimasagut ingerlariaqqinnissatsinnut ajunngitsunngortillugit nukittoqutigissavagut, taanna oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat