Hammond: Inatsisitigut ataataqanngitsut pillugit suliaq naammassineqanngilaq
Inatsisitigut ataataqanngitsut ataataminnik toqukkut annaasaqarsimasut immikkoortinneqartarnerisa kingunerisaannik Europami Inuit Pisinnaatitaaffiinut Eqqartuussiviannut suliakkiuteqartoqartariaqartassasoq, Nalaakkersuisut siulittaasuata Aleqa Hammondip naalagaaffeqatigiit siuttuisa Savalimmiuni ataatsimiinneranni ilaatigut erseqqissaatigaa.
Savalimmiormiut lagmandiata Kaj Leo Holm Johannesenip, danskit ministeriunerata Helle Thorning-Schmidtip aamma nunatsinni naalakkersuisut siulittaasuata Aleqa Hammondip naalagaaffeqatigiittut ukiumoortumik ataatsimiinnerat, Savalimmiuni pisoq, ippassaq naammassivoq.
Aleqa Hammond oqarpoq Inatsisitigut ataataqanngitsut pillugit suliap ingerlaqqinnissaanut eqqartuinissamut periarfissaqarsimalluni. Suliap killiffia nuannaarutigigaluarlugu inuit ataataminnik toqukkut annaasaqarsimasut suli immikkoortinneqartarnerat naammaginngilaa.
- Tamanna pissusissamisuunngilaq, ajoraluartumillu isumaqarpunga Institut for Menneskerettigheder peqatigalugu Europamiut Inuit Pisinnaatitaaffiinut Eqqartuussiviannut ukiuni aggersuni suliakkiissuteqartoqartariaqassasoq, Aleqa Hammond oqarpoq.
Akisussaaffiit tigoriikkat inatsisitigullu ataataqanngitsut naalagaaffeqatigiinni siuttut eqqartoraat
Oqartussaaffiit tiguneqarsimasut, soorlu aatsitassanut tunngasut nunatta nammineq akisussaaffigigai naalagaaffeqatigisanut eqqaasitsissutigisariaqarsimanerarpaa, tassungalu tunngatillugu erseqqissaatigisimavaa nunatta inatsisiliornikkut inatsisinullu atortitsinermut tunngatillugu nammineq akisussaaffigigai.
Naalakkersuisut siulittaasuat aamma oqarpoq Danmarkip malittarisassat eqquutsinnissaannut atatillugu pingaarutilimmik inissisimanermigut qulakkiigassaqartoq.
Suleqatigiinnerup nukittorsarnissaa ajornartorsiutillu takkuttut qanoq aaqqiivigisarnissaat pillugit naalagaaffeqatigiit siuttuisa ataatsimiinnerminni oqaluuserisaannut aamma ilaapput.
- Oqaloqatigiinnissamut suleqatigiinnissamullu periarfissaqarnissaa pingaaruteqarpoq, matumanilu Danmark avammut iliuuseqarnermi ataqatigiissaarisutut pingaarutilittut inissisisimavoq, pingaaruteqarneralu ukiuni aggersuni suli annertunerulertussaavoq, Aleqa Hammond oqarpoq.
