Hamasit ujajaapput

Palæstinamiut ingasattajaarnianut sakkulersortartunut Hamas-ikkunnut ilaasortat Gazami præsidentip illorsua ujajaaffigisimavaat, naak Hamasip aamma Fatah-p siuttuisa silatusaarnissaq kajumissaarutigigaluaraat. Hamasip Gaza tamaat nakkutigisarilersimavaa aamma naalakkersuisut siulittaasuat Hamas-imeersoq tunuarumanngilaq, naak præsident Mahmoud Abbas-imit soraarsitaareeraluarluni kingoraartissanilu toqqagaareeraluartoq.

Palæstinami pissutsit nakkutigineeruttutut ipput, kisianni inuinnarnut allatut malunniuppoq.

Ullumikkut ippassaanikkunnut naleqqiullugu eqqissisimanarneruvoq. Tassami pissutsit inissikkiartortutut ipput. Palæstinamiut namminersornerullutik ingerlatsinerat ajutoorpoq, Palæstinamiullu immikkoorluinnartunut marlunnut avissimapput.

Upperisarsiortut ingasattajaarniat suliniaqatigiiffiata Hamasip Gaza millionit aappaata affaanik inulik nakkutigisarilerpaat, suliniaqatigiillu upperisarsiortuunngitsut Fatah-p Vestbredden millionit pingajuata affaanik inulik nakkutigisarilerlugu. Taamaalilluni Palæstinamiut namminersornerullutik ingerlatsinerat ataatsimut ingerlanneqarunnaarluni marlunnut avinneqartutut taaneqarsinnaavoq.

Innuttaasut 80 procentii avataaniit ikiorneqarnissamik pisariaqartitsisuupput sapaatip akunneratalu siuliani innuttaasut imminnut sorsuunnerattut ittumi pissutsit ajorneruleraluttuinnarput. Israelip Gazamut killeqarfini matoreerpaa, taamaalilluni Gaza avammut atassutaarullugu. Marlunngormalli nerisassanik pajuttoqarami suli pajuttoqaqqinngilaq. Nunat tamalaat akornanni ikiuiniaqatigiiffiit ajunaarnersuaqarnissaa annilaanngatigaat.

FN-imit sakkutuunik Gazaliartitsinissaq eqqartorneqaraluarpoq, kisianni nunat aatsaat oqartussaasunit, tassa Hamasimit aggersarneqarunik sakkutuuliisinnaapput.

Palæstinamut aningaasaliisartut pingaarnerit, tassa EU aamma USA, Naalagaaffiit Peqatigiit Ruslandilu peqatigalugit nalunaareerput akerleriinnermi præsident Abbas tapersersoritsik. Taamaalilluni Hamas Gazamilu innuttaasut neriuutissaqarpallaanngillat.