Hamasikkut sulinertik aallartippaat

Hamas-ikkut naalakkersuisunngortut islamimik upperisaqartut, palæstinap naalakkersuisuini sulinertik ullumi aallartippaat, naalakkersuisunngortullu Israeli akiortuarniarlugu neriorsuuteqarput. Naalakkersuisunngortut nunanit kitaaneersunit attaveqarfigiumaneqarunnaarnertik soqutiginngilaat, piviusorli tassaavoq naalakkersuisunnguinnarlutilli aningaasaataarutingajareeramik.

Naalakkersuisunngortut suliassaasa siulliit ilagivaat, Palæstinamiut namminersortut pisortaqarfiata sulisuinut 140.000-nik amerlatigisunut akissarsititsissallutik. Akissarsiassaat ulluni qaninnerni tunniunneqartussat.

Hamasip ajugaanerata kingorna akileraarutit Palæstinami namminersornermut nakkartinneqartussaagaluit Israelip paarnaarsimavai. Akileraarutit 50 millioni dollarsinik qaammammut naleqarput.

USA-p aallartitani suleqatinilu ippassaq piumasaqarfigaat palæstinap ministeriaqarfiinut attaveqarnitik unitsissagaat, Canada-miullu palæstinamiut pisortaannut tapiissutigisartakkatik aamma unitsippaat.

Hamasimi naalakkersuisunngortut Israelip piuneerutinnissaanik sulissuteqaratik oqaatigerusussimanngilaat, USA-miillu EU-mit Ruslandimit Naalagaaffiillu Peqatigiinnit juutit naalagaaffiannik akuersinissaq, nakuusernermillu atuisoqannginnissaanik piumasaqaatit aamma akuersaarumasimanagit.