Hamas-it Fatah-llu eqqisseqatigiipput
Palæstinami januaarimi inatsisartunut qinersinermi Hamas ajugaammalli sorsuttartut Hamas-imut illersuisut illuatungaanilu præsident Abbas-ip partiianut Fatah-mut illersuisut, imminnut akersuuttuarsimapput.
Soorlu nukappiaq 16-inik ukiulik ullaaq ikilerneqarpoq, Hamas-ikkut kiinnarpalersorsimasut sakkulisartullu Fatah-mullu illersuisut Gaza-p illoqarfiani aporaammata.
Ippassaq illuatungeriit avammut nalunaaruteqaraluarput akiuukkunnaarallarniarlutik, kisianni isumaqatigiissut tamanna aallartinngitsorluunniit unioqqutinneqarpoq.
Naak ippassaq immaqa akiuukkunnaarallartoqarnissaa eqqartorneqaraluartoq, pissutsit nakkutigineqarsinnaajunnaalerput.
Naalakkersuinermik suliaqartut siuttuisa akiuukkunnaarallarnissaq kissaatigigaluarpaat, kisianni aaqqiagiinnginnermi massakkut killiffiusoq unitsikkuminaatsorujussuuvoq. Tassami saassussisarnerit akiniaallunilu saassusseqqittarnerit paarlakaatiinnavipput. Aqqusinernilu inuit 10.000-it sinneqartut sakkulersorsimammata pissutsit nakkutigineqarsinnaanngillat.
Fatah-kkut ukiorpassuarni pissaanermik tigumiaqarnerminni inuusuttunik 10.000-ilikkaanik isumannaatsuunissamik suliaqartunik illersortissarsisinnaasimapput.
Aammattaaq Hamas-ikkut januaarimi pissaanermik tigusigamilli isumannaatsuunissamik suliaqartunik sakkulersorsimasunik pilersitsisimapput.
Taamaalilluni Palæstinami massakkut angutit sakkulersorsimasut 10.000-ilikkaat illuatungerillutik inissisimapput. Danmarks Radiup kangiani qiterlermi ilanngutassiortua Steffen Kretz taama nalunaaruteqarpoq.
