HAMAS aamma Israel sakkuaakkunnaarput

Israelimit ullumikkut uppernarsarneqarpoq, Gazami suliniaqatigiiffimmut Hamas-imut sakkuaakkunnaarnissamik isumaqatigiissuteqartoqartoq.
Allattoq Elisa Isaksen
juunip 18-at 2008 12:29

Taamaalilluni Israel Hamasimik, peqqarniisaarniatut isigisartagaraluaminik, siullerpaamik isumaqatigiissuteqarpoq.

Isumaqatigiissut, qaammatini arlalinni Igitsini ikiorsiullugu isumaqatigiinniutigineqareersoq, aqagu ullaakkumiit atuutilissasoq Israelimiut sakkutuuisa naalagaasa ilaat nutaarsiassaqartitsivimmut Reutersimut oqarpoq.

Israelimi aviisi ullormut saqqummersartoq Ha’aretz naapertorlugu, Israel Gazamut saassussinnginnissamik pisussaaffilerneqarpoq, kiisalu Hamas Gazamiit Israelimut saassussinnginnissamik pisussaaffilerneqarluni.

Isumaqatigiinniarnerit ingerlateqqillugit Igitsinip Israelimiut sakkutuuisa ilaata Gilad Shalit-ip, Hamasimit 2006-imi juunimili tigummineqartup, iperagaanissaa sulissutiginiarpaa.