Hall of Fame Kalaallit Nunaat pilersinneqalerpoq

Hall of Fameimi nersorniarneqassapput timersornikkut malunnaatilimmik nunatsinni, nunattalu avataani sunniuteqarluarsimasut. Nersorniarneqartut toqukkut qimagutereersimasuusinnaapput, aamma suli peqqillutik ingerlatsisimasut. Ukiullu ingerlanerini timersortartut amerlasuut pikkorilluinnartut nunarput sinnerlugu sassatarsimapput.

Hall of Famemut ilaasortanngortitsiniarnissaq unammillernartuusussaassaaq, ukiorpassuarni timersortartuusimasorpassuit assigiinngitsut takutitsilluartarsimaneri pissutigalugit, ilaatigullu ilaasortaasinnaasutut taaneqarsinnaasut ukua piukkunneqarsinnaapput: Apollo Lynge Nunarput sinnerlugu siullersaalli OL-mi peqataaqqaartoq, sisorartartut Arne Hardenberg, Michael Binzer, Morten Jørgen Heilmann, Taekwon-domi unamisartoq Christian Isaksen, Assammik arsartartuusimasoq Jakob Larsen allallu.

Elite Sport Greenlandilp aningaasaliisartui siulersuisuni inissisimanissaat naatsorsuussaavoq. Taamatuttaarlu KNR aamma Sermitsiaq.ag siulersuisuni issiatitaqassallutik. Naatsorsuutigineqarpoq ukiumi nutaamiit maleruagassanik aaqqissuussinissaq piareersarlugu, ilaasortaasinnaasunik ikkussinissamik aaqqissuussisoqassasoq.