Halibut Greenland Upernaviup eqqaani tunisassiorfiliorusuppoq

Aalisartut Upernaviup eqqaamiui 50 tungaanoortut qaleralinnik tunisassiorfissamut piginneqataaniarlutik nalunaareersimapput.

Halibut Greenland piginneqatigiiffittut atorneqartussamik Halibut Greenlandip ataani maanna pilersitsereersimavoq, Aappilattumilu tunisassiorfiliornissamut Naalakkersuisunut qinnuteqaammik nassiussereersimallutik.

- Ilumoorpoq Aappilattumi fabrikkiliorniarluta qinnuteqarsimavugut. Aamma tassunga atatillugu selskabeq pilersereersimavarput. Soorunalimi aalisakkat tappavaniittut soqutigigatsigit taamatut iliorpugut. Sapinngisamik aalisakkat amerlanerpaat taakkua tigorusuppagut, Niels Thomsen, Halibut Greenlandip pisortaa taama oqarpoq.

Halibut Greenlandillumi Ilulissani piginneqatigiiffittut ilusertik Upernaviup eqqaani tunisassiorfiliornissamut akuerineqassagunik atorusuppaat.

- Massakkut 50-ngajaat piginneqataaniarlutik nalunaareernikuupput, oqareerlutillu qanoq aningaasaleeqataaniarnerlutik. Tassa piviusorsiortorujussuuvoq. Qinnuteqaammut tamakku soorunalimi taputartuunnikuuagut. Aningaaseriviit oqaloqatigereerpagut. Oqarsinnaagunarpunga amigaataasutuaannanngorpoq Naalakkersuinikkut akuersisoqarnissaa, Niels Thomsen oqarpoq.

Aappilattumi tunisassiorfiliariniarneqartoq Ilulissani tunisassiorfiup assipalorissavaa.

- Immaqa fabrikkitut amerlasuut taaneqartartut tappavani tigooraaviinnaapput qerititsiviinnaallutillu. Uagut fabrikkivik. Una tununni takusinnaasarsi, taassuma sannaa assigisorujuussua. Tassa aalisagaq tiguneqassaaq, tunisassiarineqassaaq, qeritinneqassaaq taavalu soorunami nassiunneqarluni. Sumiiffimmi suliffinni pilersitsiffiussaaq amerlasuunik aamma taannartaa, Niels Thomsen oqarpoq.

Aappilattumi qaleralinnik tunisassiorfissaq 2016-imi ammarneqarsinnaanera Halibut Greenlandimit neriuutigineqarpoq.