Halibut Greenland sulisussaaleqiffioqqippoq
Suleqatigiiaanimi ataatsini maanna ingerlasuni, 24-nillu inuttaqartumi, sisamanngornermi suliartortut taamaallaat aqqaniliupput.
Tamannalu suliffeqarfiup pisortaata, Niels Thomsenip, facebook-imi quppernini aqqutigalugu sulisussarsiortariaqarneranik kinguneqarpoq.
Taassumalu sulerusuttut tamaasa tikilluaqquneqartut oqaatigaa.
- Nunaqavissut sulerusuttut tamaasa siullertut tikilluaqquvagut. Aamma Ilulissat avataanit suliartortoqarussuppat inissaqarniarnikkut aaqqiissuteqarsinnaanersugut misissorneqarsinnaaavoq, Niels Thomsen KNR-imut oqarpoq.
Avataanit suliartortitsisinnaanissaq eqqarsaatersuutigineqarsinnaasoq
Halibut Greenland Nunatta avataanit tikisittariaqarsimasaminnik filippinerinik maanna sisamanik sulisoqarpoq. Taakkulu sulilluarput.
- Sulisussaqarniarnerput taamaginnassappat allaqqussinnaanngitsutut eqqarsaatigineqalersinnaavoq Nunatta avataanit tikisitseqqittariaqarnissarput. Nunaqqatitsinnilli sulisoqarusunnerungaluarpugut, Niels Thomsen oqarpoq.
Halibut Greenlandimi pisortap tunisassiorfimminni suleqatigiiaat maanna ataatsit ingerlasut sulisussaqarnerungaluarunik marlunngortissinnaangaluarlugit aamma oqarpoq. Piffissamimi matumani qaleralinnik saarullinnillu Halibut Greenlandimut tulaassuineq ingerlalluarmat.
Avannaata Kommunianit KNR-imut ilisimatitsissutigineqarpoq Ilulissani ulluni makkunani suliffissarsiortunik nalunaarsortoqarsimanngitsoq. Taamaattorli Avannaata Kommuniani nunaqarfinni assigiinngitsuni arfinilinni aamma illoqarfinni assigiinngitsuni marlunni ullut makku suliffissarsiortut katillugit 22-t nalunaarsorneqarsimapput. Avannaata Kommunianiillu ilisimatitsissutigineqarpoq kommunimi sumiiffinni tamani sulisussaaleqineq maanna ajornartorsiutaasoq.