Qimaasulli tigusat parnaarussiviannut tusaamanerlunneqartumut inississuiniarnani parnaarussiviup ittuata neriorsuutigivaa.
Siornatigut Haitimiut angallateeqqanut ilaallutik USA-mut qimarrattareermata taamatut pisoqaqqinnissaa ilimagineqarpoq.
Qimaasullumi Cuba pinngitsooratik avaqquttussaagamikku qimaasut tiguneqartut Guantanamomi inissikkallartarnissaat maannakku siunniunneqarpoq.
Guantanamomilu sakkutooqarfiup qullersaa kontraadmiral Thomas Cooperman oqarpoq toqqit inunnut 1000-nut naammattut nappaassorsimareeritik, sulilu 10.000-inut naammattunik tupissamaateqarnerarlutik.
Tupeqarfimmilu anartarfiit imeqarniarneq pisariaqartitallu allat isumannaarneqareersimasut oqaatigineqarpoq.
Aamma qimaasunik inissiviugallartussaq parnaarussivimmut atassuteqarnavianngitsoq kontraadmiralip naqissuserpaa.
Parnaarussivik, qimaasunillu inissiiviusussaq Guantanop kangerliumarngani akileriipput.
Haitimiorpassuit qimarratilernissaat USA-p pissutissaqavilluni ilimagilluinnarpaa, tassami Haitimi pissutsit ajorsilluinnaraangata USA-mut qimarratilertarneri siornatigut misigineqartareernikuuvoq, taama David Rodcuff Clintonip 90-ikkunni aningaasaqarnermut naalakkersuisuata tullersortigisimasaa oqarpoq.
Haitimiorpassuit illoqarfiit pingaarnersaaniit Port au Prince-miit ulluni makkunani qimarrapput, ilaalu angallateeqqat atorlugit qimarrapput, Haitillu avannaatungaanut nunnissimassanersut imaluunniit avannamut USA-mut ingerlaqqissimassanersut ullualunnguit qaangiuppat nalunarunaassaaq.
Amerikamiulli umiarsui alapernaarsuutit Guantanamomilu sakkutooqarfik taamatut pisoqarnissaanut piareersimapput.