Haitimi pissutsit ajorsiartorput

Nuna marlunngormat sajummat illut ajoqusingaatsiarput, ajorseriaqqinnissaallu ernummatigineqarpoq.

Inuit atisassarsiortut pisariaqartitanillu ujarlertut imaaginnavipput, pigisallu maaniinnarmi qimatat inuit 1000-it ullumi pilerguppaat.

Nutaarsiassaqartitsivik Reuters taama tusarliivoq.

Ujaqqanik milloortoqarpoq, savilersortoqarluni, kaattamillu sakkulisartoqarluni. T-shirtit, taskit, pinngussat najugaqarfinneersut pisiniarfinneersullu allat pilerngunneqarput.

- Inatsisaatsuussuseq maanna atuuppoq. Politiit peqangillat. Assiliisoq oqarpoq.

Ullut sisamat qaangiupput nuna Haitimi sajorujussuarmalli, inuillu neriuutissaarukkiartuinnarput.

Ikiueqqaarnermut atortunik nakorsaatinillu utaqqiuarsinnarput, ilaquttallu suli ujaarineqarlutik.

Haitimi oqartussat ulappupput, suliarli imaannaanngilaq:

- Inuit 50.000-it missaat toqusimapput, naalagaaffimmi pissutsinut ministeri Antoine Bien-Aime oqarpoq, nangillunilu:

- Inuit 100.000-it 200.000-illu akornanni ajunaarsimanissaat ilimagaarput, tamannali eqqoriaanerinnaavoq, ministeri oqarpoq.

Kisitsisit Haitimut saqqummiunneqartut eqqorpata, Haitimi nunap sajunnera nunarsuarmi ajunaarnersuit annerit qulit ilarissavaat.