Haitimi inuussutissanik ikiuineq præsidentip unitsinniarpaa
Ajunaarnermi nerisassanik imermillu ikiuineq januaarip aqqaneq-aappaanni nuna sajummalli Haitimiut ajunaarnersuup nalaani inissaarussimasut 1,2 millionit annanniutigisimavaat. Ataasinngormat tusagassiortunik katersortitsinermi Rene Preval oqaluttuarpoq ajunaarnermi ikiuineq taamaaginnaruni Haitip aningaasarsiorneranik qajannarsisitsissasoq, iluaqutaananilu ajoqutaaginnassasoq. Taamaalissaaq inuussutissat akeqanngitsut pissutigalugit Haitimiut naasorissaasut inerititaasa tunineqarnissaat ajornavissammat. Akerlianilli taassuma nunap sanarfeqqinnissaanut ikiorneqarnissaq Haitimilu ajunaarnersuaqanngikkallarmalli aningaasarsiornikkut ajornartorsioreersumi suliffissanik pilersitsinissaq piumaneruai.
Præsident Rene Preval USA-llu præsidentia Barack Obamap Det Hvide Husimi pingasunngorpat ataatsimeeqatigiissapput Haiti ajunaarnersuaqarfiusoq oqaluuserissallugu.
Ikiuiniaqatigiinni Folkekirkens Nødhjælpimi siunnersuisartoq Niels Carstensen Haitimeeqqammerpoq Rene Prevalillu isumakuluuteqarnera paasilluarsinnaallugu, ikiuinerulli maanna unitsereernissaa mianersoqqussutigalugu.
- Siunissaq qaninnerusoq eqqarsaatigalugu inuussutissanik ikiuinerup unitsinneqarnissaa assorsuaq ulorianaateqassaaq inuit 100.000-illit immaqalu 1 millionit angullugit nerisassanik akeqanngitsunik ajunaarnermilu ikiuutinik pissarisarisartakkaminnik isumalluuteqarmata, soorlu imermik, inisimmavissanik, ulissuarnik assigisaannillu pisariaqartitsillutik, tassa siunissaq qaninnerusoq eqqarsaatigalugu tamanna assorujussuaq ulorianaateqarpoq. Siunissarli ungasinnerusoq eqqarsaatigalugu erseqqissarneqarpoq ajunaarnermi ikiuutinik inuussutissanillu akeqanngitsunik piffissami sivisuumi agguaassisoqaannarpat, tamanna inuiaqatigiinnik amerlaqisunik eqquissaaq, taavalu Haitimi aningaasarsiorneq qajannarsissalluni, tamatumani tassa eqqortumik oqimaaqatigiissaarinissaq pisariaqarluni, oqimaaqatigiissaarinerlu tamanna pilersinneqarnavianngilaq ajunaarnermik ikiuutit aqagu unitsinneqassagaluarpata, Niels Carstensen DR-imut taama oqarpoq.
