Haitimi ikiuissutissanik suli anngussiniarsarisorujussuupput
Nerisassat, assartuinermilu akigitinneqartartut marlunngormat kingullermili qaffariartupiluulersimapput. Inuillu eqqugaasimasut hunnoruju-tuusintilikkaat erloqineruleriartuinnartortillutik nakuusernerit ujajaanerillu aamma amerliartuinnavipput.
Angerlarsimaffissat, anartarfiit imerlu, nerisassat nakorsaatissallu suli ajornakusoortupilussuupput, taama International Røde Korsimi aqutsisuusoq Richardo Conti oqaluttuarpoq. Port Au Prince-ip eqqaani tupeqarfiliani eqqiluisaarnissamut atortussat amigaataaqaat. Tamaani anartarfiit ikittuinnaapput imerlu killeqaqaluni.
Nappaalasorpassuaqassanngippat allatut ajornaqaaq pissutsit aaqqiivigisariaqarput, Røde Korsip qullersaa taamatut erseqqissaavoq.
Nuna sajoqqissimavoq, tamatumuuna Guatemalap manerassuarmi sineriaani El Salvadorip killeqarfiani nuna sajussimavoq. Richterip uuttuutaa malillugu 6,0-imik sakkortussilimmik nuna sajussimavoq. Guatemalap illoqarfiisa pingaarnersaaniit 100 kilometerinik kujasik kangisinnerusumiittumi nunap sajunnera pisimavoq. Tamaanilu qanoq kinguneqarsimanersoq suli paasisinnaasimanngilarput.
