H1N1 peruluutaasinnaajunnaarpoq

H1N1 - puulukit nualluutaat - atuukkunnaartutut nalilerneqarpoq. Naalagaaffiit Peqatigiit peqqinnissakkut suleqatigiiffiat WHO nalunaarpoq nualluutip atuutereernermi kingorna ima sakkukitsigilersimasoq allaat nualluutitut naliginnaasutut sunniuttalissalluni.
aggustip 12-at 2010 07:26

Nualluut WHO-p 11. juni 2009-mi Mexicomi atuutilersutut nalunaarutigaa, nualluullu ernummatigineqartutut taama sakkortutiginngilaq.

Taamaakkaluartoq WHO taamani nunarsuaq tamarmut mianersoqqussuteqarpoq nualluut sakkortooq, 1968-mi Hongkong nuallussuup atugaanerata kingorna siulleq, immikkut sillimaffigisarialik atuutilernerarlugu. Tamannalu pillugu WHO tusakulutsitaangaatsiarpoq.

Taamatut nalunaaruteqarnissamik aalajangeeqataasut ilaat nakorsaasiorfissuarnik piginneqataammata taamaalillutik iluanaaruteqartunut ilaasimallutik.

Nunarsuaq tamakkerlugu H1N1 inunnit 18.239 uppernarsaatitalinnik toqussutaasimasoq nalunaarutigineqarpoq, kisitsilli annertuneroriaannaavoq.

H1N1 Danmarkimi inuit 33 toqqutigaat, nunatsinnili toqussutaasimanersoq ilisimaneqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq