Høvdingi isumaqarpoq kalaallit aatsitassarsiorfinni suliffissaqarnissartik qulakkeersinnaagaat
Aatsitassanik piiaanermi kalaallit suliffittaarnissartik qulakkeerluarsinnaavaat. Qulakkeerinninnissamut peqatigiiffeqarnissaq piiaatitsivinnillu pitsaasumik attaveqartarnissaq piumasaqaataavoq, taama isumaqarpoq Judith Sayers Vancouver Islandimi Hupacasath First Nationip høvdingi. Thomas Gruep høvdingi innuttami suliffissaqarnissaanik ilungersuutiginnissimasoq naapisimaarsimavaa.
-Isumaqarpunga nunap inoqqaavi, suliffeqarfiit tamaasa nunagisaminni sulerusuttut sunnerniassagaat. Aallaqqaataaniilli piginnittut pisortallu piumasaqarfigineqartariaqarput, soqutigisarisat tamarmik aallaqqaataaniilli naqissuserneqarlutik. Taama oqarpoq, høvdingi Judith Sayers Canadap kitaata kujasissortaani naggueqatigiinni Hupacasath-imeersoq.
Graniti pitsaasorujussuaq naggueqatigiit aatsitassarsiornermi suleqatissatut pilerinartorujussuartut inississimavaat, Judith Sayer-illu periarfissaq taanna atorluarsimavaa
Høvdingip nerinnattorsuup aatsitassarsiortut nunaqarfimmiunut suliffissaqartitsinissaat qulakkeersimavaa, iluatsilluartumik.
Aatsitassanik piiaaffik ingerlallualerpat, piiaaffimmi sulisussat 40-t Judith Sayer-ip nunaqarfia-ninngaanneersuussapput. Sulisorineqartussat 80-t akornanni tamanna malunnaateqangaatsiassalluni.
-Naatsorsuutigaa piiaaffik ingerlallualerpat suli amerlanerusut sulisorineqalerumaartut, naatsorsuutigineqarpormi piiaaffiup ukiut 117-t ingerlanissaa. Tassani apeqqutaavoq aatsitassarsiortunut piumasaqarneq sorusunnerlunilu ilisimanissaa, Judith Sayer oqarpoq.
Nunamilli piginnittussaanermik Canada nunarpullu pingaarutilimmik assigiinngissuteqarput. Canadami nunap inoqqaavi ilungersunartunik eqqartuussinerit aqqutigereerlugit ilaatigut nunamut piginnittuunertik naqissusernikuuaat, taannalu piginnittussaaneq aatsitassanik suliffeqarfinnut kimiigiisertitsisinnaavoq pitsaasunillu isumaqatigiissuteqartitsisinnaalluni.
Taamaakkaluartoq Judith Sayer isumaqarpoq nunatsinni innuttaasut aatsitassarsiorfinni annertuumik sunniuteqarsinnaasut suliffissanillu qulakkeerilluarsinnaasut, apeqqutaaginnarluni oqaloqatigiinneq, imminut upperineq suliffeqarfinnullu aallaqqaammulli piumasaqarneq.
