Højskolernissamut itigartitaasoq: Sulerissanerpunga

Højskolerniarlutik qinnuteqartut 436-t akornanni taamaallaat 40-t tiguneqarput, Højskoleni marluusuni katillugit 180-it missaat inissqartinneqaraluarput, aningaasaliissutillu naamanngimmata 400-ngajaat itigartinneqarput. 26-nik ukiulik Kristian Løvstrøm Uummannap eqaani Saattormioq itigartitaasunut ilaavoq.

Sulerissavit?

- Haa asuki, taanna naluara.

Allanut qinnuteqarpit?

- Naamik.

Piareersarfimmi eqqarsaatiginikuuiuk?

- Qinnuteqarnikuugaluarpunga, akuerisaanikuunngilanga.

Ingerlariaqqinnissannut arlaannik aqqutissiorniarpit?

- Haa eqqarsaatigisaraluarpara taanna, Kristian Løvstrøm oqarpoq.

Saattuni 230-it missaani inulimmi suliffissaaleqillutik allatsissimasut 20–upput.

Rasmus Eliassen 28-nik ukiulik Innaarsunneersoq, Qaqortumi sulisartut højskoleanni atuarnissamut akuerisaasunut ilaavoq. Taassuma højskolemiinnini pissarsinarnerarpaa.

- Højskoleleqqaalerninni ajukkuttorujuusimavunga, suleriarsinnaanera sassarsinnaaneralu killeqarsimapput. Ilinniagaqarnissamut sapiinnerulerlunga misigisimavunga, aamma periarfissat suunersut paasisaqarfigivakka.

Tassa ilinnut ammaasisuuvoq?

- Aap uannut ammaasisuuvoq siunissamut, Rasmus Eliassen oqarpoq. Taanna ukiumi nutaami ilinnialernissaminut aaliangiussivoq.