Højskole - Taamaallaat angutinut
Angutit taakku ikorfartoqatigiinnissaq siunertaralugu naapeqatigiinnermi siullermi peqataapput. Ilisimaneqartutut inuiaqatigiittut aaqqissuussaanerput qangaanerusumut sanilliullugu allannguuteqangaatsiarsimavoq, tamannalu angutinut arnanullu, taamatuttaaq ilaqutariinni inuusaatsikkut allanngornernik angisuunik nassataqarsimalluni, Kommuneqarfik Sermersooq nittartakkamini taama allappoq.
Angutit arnallu isummersortarnerat, aamma inuusaatsikkut pissusaat assigiinngitsuusut misilittakkatigut ilisimavarput, soorlu misigissutsinik atukkatigut oqaasertaliinissamik angutit ajornakusoortitsinerusinnaasartut.
Tamanna tunngavigalugu Tungiuinermik Ingerlatsivimmi meeqqanik ilaqutariinnillu sullissivik aamma suliffissarsiuussisarfik suleqatigalugit ukioq sinnerlugu angutinik højskolertitsinissamik suliniuteqarneq pilersaarusioreerlugu piviusunngortipparput.
Angutit højskolertitsinermi peqataanertik inuttut pissarsiaqaatigilluarsimallugu oqaatigaat, ilaatigut inuunerminni atukkaminnik maluginiagaqalerlutillu ingerlariaqqikkusunnermik piumassuseqalersitsimmat.