Høgni Hoydal: Allaffilerngusaanneq utoqqatsissutaaginnarpoq
Joannes Eidesgaard siulittaasoralugu Republikanerillu siulittaasuat, Høgni Høydal naalakkersuinikkut sunniuteqarluartoq nunanut allanut ministereralugu Socialdemokratit, Republikanerit Centerpartiilu ippassaq tikillugu Savalimmiuni naalakkersuisoqatigiittut suleqatigiikkaluarput. Høgni Høydalimit allaffimmut ataatsimut, Inatsisartut illuanniittumut isitsaalineqarsimanini pissutigalugu Republikanerit suleqatigerusukkunnaarlugit Joannes Eidesgaard oqarpoq. Høgni Høydalili oqarpoq atorfilittat aqqutigalugit isumaqatigiinnginneq ingerlanneqarsimasoq, politikkikkullu suliassaanngitsoq. Høydalip ilimagaa allafilerngusaanneq utoqqatsissutaaginnartoq, piffissarmi kingulleq naalakkersuisoqatigiit isumaqatigiinngissuteqartarput, minerunngitsumik Savalimmiuni aningaasaqarniarnerup ilungersunarsiartuinnarnera pissutigalugu.
- Uagut sioqqulluta naalakkersuisuusut sanaartugassanik akisuunik aallartitsisimammata, kiisalu Socialdemokratit Namminersulerniat Partiiat peqatigalugu Danmarkimiit tapiissutit ikilisarnissaat isumaqatigiissutiginikuummassuk aningaasaqarnikkut isumaqatigiinngittuarsimavugut, Høgni Høydal oqarpoq. Uggornaqaaq naalakkersuisoqatigiikkunnaarnitta allafilerngusaannermik pissuteqarnerarnera aamma avataaniit upperineqarmat, Høgni Høydal naggasiivoq.
