VIDEO Høegh 16-inik isertitsigaluartoq nunatta Chile ajorsarfigaa

Kalaallit angutit assammik arsarlutik nunanut allanut unammisartui, Amerikap nunavittaani assammik arsarluni unammersuarnerni Chilemut ippassaq unammigamik ajorsarput.
juunip 14-at 2016 10:13
Nutserisoq Mads Lynge

Unammisut nikinneranni 16-16-imik naligiittoqaraluarpoq, unamminerli naammassimmat Chile 37-29-mik ajugaalluni. Unammersuarnernik aaqqissuisut pisortatigoortumik nittartagaanni tamanna atuarneqarsinnaavoq.

Argentinap gruppimi normu 1-itut inissinnissaa ilimagineqarmat, Chilemut unamminissaq pingaaruteqartorujussuartut nalilerneqarpoq, normu 2-tut inississinnaanissamut neriulersitsissammat.

Kalaallilli arsartartuisa ilaat Minik Dahl Høegh Chilemut unamminermi arsarlualaavippoq, 16-eriarlunimi isertitsigami. Taamaattoq kalaallit tassa ajorsarput.

Minik Dahl Høeghip isertitsinerpassui qulaani takusinnaavatit.

Kalaallit Nunaata gruppiani unamminerit inerneri imaapput: Argentina Mexicomut 42-17-imik ajugaavoq, Canadalu Guatemalamut 27-24-mik ajugaalluni.

Argentina taamaasilluni Gruppe A-mi siuttunngorpoq, Chilelu tulliulluni. Argentina Chilelu tamarmik 6 pointeqarput, Kalaallillu Nunaat pingajuattut inissisimavoq sisamanik pointeqarluni.

Kalaallit nunanut allanut unammisartui Argentinamut aqagu pingasunngornermi unammissapput.

Unammersuarnerni nunat aqqaneq-marluk peqataapput, pitsaanerillu pingasut Frankrigimi aappaagu VM-ertoqalerpat peqataassapput.